A Rolda de Rebeldía distancia aínda máis a Beiras da UPG e de Máis BNG

A sala do Hotel Compostela ficou pequena o sábado para acoller a toda a xente que participou na Rolda de Rebeldía FOTO: Ramón Escuredo

"Non nos pareceu de recibo participar nun encontro onde ían discutir forzas que son do BNG e forzas que son de fóra. Non ten lóxica, sobre todo porque se incluía xente que ten demostrado o seu pouco aprezo polo Bloque. De feito, quen foi quedou abraiado co que escoitou. Entendemos que iso non ía ser un foro de reflexión política, senón que tiña unha parte moi autodestrutiva e a UPG, polo respecto que lle temos ó Bloque, vimos absurdo ir. Cada un pode ter os seus puntos de vista, pero discutir cos de fóra estando dentro... tería unhas repercusións públicas, e aí está a nosa responsabilidade". Así lle explicaba onte Roberto Vilameá, secretario de Organización da UPG, a GH a decisión da formación maioritaria que integra o Bloque de non participar na Rolda de Rebeldía que congregou o sábado en Compostela a centos de persoas vinculadas á esquerda nacionalista e social do país co fin de debater sobre a "inoperatividade" dos partidos clásicos e a necesidade dunha maior comunicación entre as partes.

A xuntanza impulsada polo Encontro Irmandiño, a corrente que tamén integra o Bloque e que lidera Xosé Manuel Beiras, aumenta aínda máis o afastamento interno entre Beiras e a UPG e incluso Máis BNG.

Os de Francisco Rodríguez non ven con bos ollos que Beiras impulsase un foro de inscrición aberta. "Nunha organización seria que lle ten querencia ó proxecto común, as cousas non se fan así", insiste Vilameá, quen aproveitou para reprocharlle a Beiras que "dentro do BNG hai unha comisión de estratexia, que se creou a proposta do EI e que preside el precisamente e nunca se convocou, aí é onde podemos discutir todo o que queira".

Tampouco na corrente liderada por Carlos Aymerich sentou ben a iniciativa irmandiña. Alegando unha afonía, o portavoz parlamentario do BNG decidiu non acudir á chamada. No seu lugar e representando a Máis BNG estivo Xoán Bascuas, unha das poucas voces que se escoitaron na Rolda defendendo que o Bloque segue a ser un instrumento útil. Onte Bascuas aseguráballe a este periódico que valora "positivamente calquera foro de reflexión crítica e construtiva da esquerda e do nacionalismo". "A Rolda de Rebeldía veu desenvolver un traballo que as axendas políticas impiden que se poida executar, e é poder pararse e pensar", engade. Bascuas considerou que na Rolda "houbo críticas ó BNG, algunhas que poden estar ben argumentadas, pero quedaron aí. Creo que se está correndo o risco de sacrilizar a idea dos movementos sociais e fálase dunha crise ligada ó BNG cando é unha crise que desde a década dos anos 60 está cuñando a esquerda, o modelo económico, o modelo de estado e a formulación dos modelos organizativos dos partidos", advirte.

A unión co independentismo non senta nada ben

Bascuas di que se Máis BNG aceptou participar nese foro foi porque "dialogamos con todo o mundo", pero advertiu a Beiras de que "os debates que afectan ó BNG teñen que darse no seo do BNG", aínda que "é certo que para que unha organización estea viva ten que escoitar os axentes sociais".

Segundo puido saber GH, no entorno de Aymerich son bastante críticos co que se formulou na Rolda de Rebeldía. "Aí o que se postulou é algo parecido a empezar de novo o nacionalismo independentista porque Beiras se deu conta de que non ten cabida dentro do BNG ou está a quedar fóra del", aseguran fontes consultadas. "Máis BNG segue mirando para o Bloque, non sei se o EI tamén ou mira máis para fóra", afirman. Non obstante ven importante que Máis BNG estivera no foro que "prentendía ser un acto de certificación da morte do BNG", porque "ía ser o único que defendera ó Bloque" alí. Aínda así, aclaran que un acto así nunca o impulsarían eles. "Temos como referentes sociais outro tipo de persoas".

Fontes internas tamén aseguran que a día de hoxe a situación entre os irmandiños e a UPG é de "tirar a dar". Afirman que as relacións entre Beiras e Paco Rodríguez son cada vez máis tensas, tanto no Consello Nacional como noutros ámbitos internos, facéndose contrapropostas acotío.