A ciencia é máis beneficiosa que prexudicial, cre o 60% dos galegos

O Observatorio da Cultura Galega, que depende do Consello da Cultura Galega, destacou onte que o 60 por cento dos cidadáns galegos cre que a ciencia e a tecnoloxía reportan beneficios superiores ós seus prexuízos, mentres que o 9,4 por cento perciben que os seus males son maiores.

Así o extrae da enquisa Percepción social da ciencia, investigación de carácter bianual a cargo da Fundación Española da Ciencia e a Tecnoloxía (FECYT) que ofrece unha "panorámica comparativa" sobre o estado da cultura científica.

No que se refire a Galicia, o observatorio resalta a existencia de "unha maior proporción de procientíficos" respecto ó 53 por cento de persoas que no conxunto do Estado valoran os beneficios da ciencia.

No entanto, nesta comparación, tamén son menos os galegos que cren que beneficios e prexuízos están equilibrados -un 20,81 por cento, fronte ó 26,86 por cento estatal-, polo que o observatorio interpreta que a taxa de escépticos é maior. En investigación científica, un 61,5 por cento pensa que Galicia está "máis atrasada que o resto".