J. A. Durán achega novas perspectivas sobre Rosalía

O xornalista e escritor José Antonio Durán presentará o vindeiro luns no Museo de Pontevedra o documental Sombras sen sombra: O caso Rosalía de Castro, producido polo seu Taller de Edicións. A estrea deste filme pechará a primeira xornada de portas abertas coa que a editora J.A. Durán inaugura a súa sede galega, na rúa dos Ferreiros, 3, de Pontevedra.

O documental, cuxos dereitos exclusivos de emisión en lingua galega foron adquiridos pola Televisión de Galicia, baséase no argumento de que a historia de Rosalía foi mal contada. Cuestiona, entre outros aspectos, que a escritora sexa filla dun sacerdote, tal como se adoita crer.

"O apoio a ese cuestionamento por parte doutros escritores e investigadores de primeiro nivel, caso de Xosé Luís Méndez Ferrín, creou a lóxica expectación", salienta Durán nunha nota de prensa. O luns, durante todo o día, os integrantes do Taller de Edicións atenderán todos os visitantes que queiran achegarse a ver como traballan. Un obradoiro de "vangarda", segundo o seu dono.