Luís Auserón asume o destino de cronner punk

Luis Auserón foi o lado máis punkeiro de Radio Futura, e ese espírito -que non o abandonou- levouno a facer versións de Frank Sinatra, Nick Drake, Joy Division ou Iggy Pop nun novo disco, un álbum que o devolve ós escenarios na súa faceta máis descoñecida, a dun crooner punk. "O punk é unha flor que nace nunha esterqueira", di o músico, que, a piques de cumprir os 54 anos, mostra a súa fascinación por este estilo e a súa capacidade para cantar en Rubbish Garbage Junk Punk, un álbum que onte se presentou en Madrid e co que emprende unha xira de vinte concertos. O novo disco xurdiu case por accidente, cando se disolveu o seu último proxecto, un grupo de pop chamado Amantes del Eco ó que "ninguén" quixo. Logo dun longo período de "frustración", desmantelou- se cando aínda tiña unha data para dar un concerto nun bar de Madrid. El propuxo entón encher esa cita cun repertorio co que, dalgunha forma, se respondía a si mesmo á pregunta de que cancións lle gustaba cantar. O concerto foi así de accidental pero suscitou tanto interese que levantou a idea de levalo a un disco.