A actriz fetiche

A actriz francesa Jeanne Moreau manifestou onte en Bilbao que, para ela, o cine "é como un reflexo do mundo" que proxecta "a natureza humana ou a natureza do director que fai a película, ou da cultura á que pertence" o realizador. Moreau foi invitada o Festival de Cine Documental e Curtametraxe de Bilbao-Zinebi, que lle entregará hoxe o Mikeldi de Honra desta edición, o número 51 do certame, en recoñecemento á súa carreira profesional.

A actriz, que protagonizou películas de directores como Buñuel, Antonioni, Truffaut e Fassbinder, indicou, nunha conferencia de prensa previa á súa participación no certame cinematográfico, que, para ela, "foi un descubrimento" porque "descoñecía a súa existencia".

"Cando me presentaron o catálogo deste certame", engadiu, "sorprendeume ver o importante e o rica e variada que é a selección de películas que nel se proxectaron nos seus 51 anos de existencia; é dicir, cando aínda Franco estaba vivo".

A actriz francesa declarouse "unha persoa namorada e realmente apaixonada do cine" e definiuse como "unha muller independente, autónoma e un pouco impertinente", aínda que recoñeceu que se deixa influír bastante, porque é unha persoa moi curiosa.

Moreau comentou que cada vez se están producindo cambios máis rápidos no mundo, sobre todo desde principios desta década" e dixo que a satisfai moito tamén "ver que cada vez hai maior número de documentais e de curtametraxes, que xa case igualan ás longametraxes".

"Quizais, con todo isto", aventurou, "o que esteamos buscando sexa intentar interpretar os sorprendentes eventos que están ocorrendo en todo o mundo e que se están dando en todas as clases sociais, sobre todo nas máis fráxiles e non tanto nas máis dominantes".

Cuestionada sobre a súa carreira como directora de películas -dirixiu Lumière (1976), un filme que tamén interpretou, e L"adolescente (1979)-, sinalou que "foi unha experiencia moi agradable".

"A primeira, Lumière, estreouse ata en Estados Unidos e tivo moi boa acollida e moi boas críticas. Na segunda deime de conta de que, quizais, non tiña un gran talento como directora, e entón decidín seguir ó servizo dos grandes directores, como actriz", sinalou. Con todo, precisou, "si vou seguir facendo dirección de teatro".