¿O día de Novoneyra?

Novoneyra na horta da súa casa do Courel, terra que el recreou cunha das linguaxes poéticas máis intensas que se usaron en Galicia no século pasado FOTO: Axencias

O próximo sábado, día 27, os membros da Real Academia Galega (RAG) terán por diante unha dura mañá, cunha orde do día callada de temas espiñentos. Por un lado, os cadadémicos deberán decidir a quen lle dedican o Día das Letras do 2010, unha selección que, en principio, non se presenta fácil xa que chegan á final dous autores de obra intensa, Uxío Novoneyra e Ricardo Carvalho Calero.

Nos últimos meses, sucedéronse os apoios a un e outro autor, o máis recente cun manifesto asinado polos concelleiros de Cultura das principais cidades do país -agás Lugo- en defensa da candidatura de Carvalho.

Máis madrugadores, porén, foron os defensores de Novoneyra, que levan varios anos preparando o terreo para a elección do escritor courelán. Neste 2009, precisamente, cúmprese o décimo aniversario da súa morte, marxe de tempo mínimo que establecen as regras da academia para dedicarlle o 17 de maio. Miles de sinaturas e chamamentos de numerosas asociacións de base apontoaron esta candidatura. Carvalho conta, ademais, cunha deavantaxe: foi o pai do reintegracionismo ortográfico e nun momento no que o novo goberno da Xunta impulsa o proceso para desregular a protección da lingua galega, a súa elección podería crear físgoas no cerrado rexeitamento que provocou esa estratexia.

Precisamente, os académicos terán sobre a mesa a análise da situación actual do idioma e, en certo modo, espérase que da reunión do 27 saia algún tipo de comunicado. Iso a pesar de que, non hai moitas semanas, presentaron un manifesto insolitamente crítico coa política da Xunta.