Xoves 02.09.2010
| Actualizado 18.41
Hemeroteca web
|
RSS
RSS
|
O himno galego interpretouse por primeira vez dez anos antes da data oficial de estrea. Así o formulou onte o musicólogo Fernando López-Acuña durante a xornada de inauguración do Congreso Pascual Veiga e a súa época no que se situou ó compositor como pioneiro do rexurdimento musical galego.
O encontro, organizado pola Consellería de Cultura, foi inaugurado onte por Luís Bará, director xeral de Creación e Difusión Cultural, xunto con Xosé Ramón Barreiro, presidente da Real Academia Galega (RAG). Bará destacou que este foco constitúe o "primeiro acto" dun conxunto de actividades arredor do autor do Himno Galego ó que cualificou como "unha figura fundamental do Rexurdimento".
O investigador e musicólogo Fernando López-Acuña sacou á luz novos datos sobre a estrea pública do himno galego, que negan que fora na Habana no 1907. Aínda que polo de agora descoñecen a data e o lugar exacto, as informacións publicadas e as partituras dos orfeóns da época apuntan a que a composición de Veiga xa facía acto de presenza no ano 1896, asegurou López-Acuña. Os primeiros datos atópanse en xornais e revistas especializadas e proveñen da polémica que xurdiu nun certame de Lugo, despois de que o Orfeón do Centro Gallego de Madrid dirixido por Veiga o perdese. Para facer fronte ás críticas, desde esta institución "faise unha declaración institucional" na que empregan a letra do poema de Pondal para defenderse "máis só os iñorantes, e feridos e duros,/ imbéciles e escuros/ non nos entenden, non". Outros vestixios sitúan a composición do galego en mans do Orfeón coruñés El Eco.
O presidente da Real Academia Galega (RAG), Xosé Ramón Barreiro, aclarou que "non se pode entender a figura do compositor sen coñecer as circunstancias que propiciou "o liberalismo logo da morte de Fernando VII". Na época aparecen unha serie de nomes de gran prestixio grazas a que "o mercado se vai abrindo no seo da propia Igrexa e do Estado que dispón de posibilidades de traballo, así como o feito de que a música entre nos plans de estudo", destacou.
Bará destaca a investigación
Luís Bará valorou o proxecto de investigación, que se iniciou hai un ano "co aniversario do falecemento" do compositor e que segue unha liña de investigación arredor "dos estudos de arquivos e do Himno".
Entra en escena o catalán Gotós
A coordinadora do Congreso, Rosa Fernádez, rexeitou a data do 13 de xullo do 1890 como o día de nacemento da composición de "Os Pinos", xa que descobre que "esta partitura non é de Veiga, senón do gañador do certame á mellor marcha rexional galega, o catalán Ivo Gotós". Ao concurso presentáranse dez composicións coa letra do poema de Eduardo Pondal, máis outra creación do mindoniense que será a que se converta no verdadeiro himno galego cuxo nacemento se sitúa "entre abril e xullo do 1890".
O catedrático do Departamento de Ciencias Musicais da Universidade Nova de Lisboa, Gerhard Doderer, ofrece hoxe a primeira das conferencias arredor de "O caso do orfeón Académico de Coímbra", ao que lle seguira o académico Xosé Luís Axeitos Agrelo con "Fontenla Leal e os símbolos nacionais", e Carlos Villanueva que descubrirá a recepción que tiña o mindoniense na prensa galega, española e americana. Xa pola tarde intervirán os críticos musicais Julio Andrade, e José Luis García del Busto.
