Os artistas ábrense á rúa

A artista franco-estadounidense establecida en Santiago, María Chenut

A arte sairá á rúa en Compostela entre o 12 e 20 de maio, coa celebración do "Roteiro de Creación Contemporánea", un encontro do público cos artistas nos seus talleres e cos espazos expositivos da capital galega.

María Chenut e Reina D"Hoore, artistas establecidas en Santiago que organizan esta iniciativa, destacan que é a "oportunidade para descubrir a cidade doutro xeito, coñecer os centros socioculturais de Santiago e as actividades que organizan". A Zona "C", situada en Bonaval, servirá de punto de información deste "Roteiro" ademais de expor unha reseña fotográfica das obras dos creadores participantes e ofrecer mapas da localización dos talleres dos creadores, galerías e centro socioculturais.

Os días 12, 13, 19 e 20, en horario de 12:00 a 14:00 horas e de 16:00 a 20:00, organizaranse visitas ós talleres de 35 artistas que traballan coa pintura, gravados, escultura, serigrafía ou xoiaría. Do 12 ó 20 de maio, o Centro Sociocultural do Ensanche acollerá unha mostra de vídeo-creacións e o de Fontiñas, A Trisca, Conxo e Castiñeiriño, exposicións de fotografía, pintura e escultura. Dous murais realizaranse en directo, do 14 ó 18 de maio nas paredes dos centros socioculturais de Fontiñas e da Trisca, por Nolo Suárez e Armando G.

Así mesmo, o artista italiano Diego Ghiddini desenvolverá a diario do 14 ó 18 de maio unha acción titulada Facce, scansioni digitali e estampa fotográfica, aprossimazioni.