Miguel Conde: “Hai que retratar as iconas de Galicia”

O publicista Miguel Conde dirixe a empresa de márketing Bap & Conde

Elixido en xaneiro Galego do Mes polo Grupo Correo Gallego en recoñecemento á súa traxectoria profesional e Mellor Publicista de Galicia por segundo ano consecutivo polos seus compañeiros de profesión, Miguel Conde está á fronte de Bap&Conde, a primeira axencia publicitaria de Galicia -responsable dos anuncios de Gadisa, Feiraco, Fadesa ou Política Lingüística- e é presidente executivo do grupo MCL-Mil Ciento Cincuenta Empresas. Onte pechou cunha conferencia o primeiro día das Xornadas de Publicidade Marca Galicia que se celebran en Pontevedra até o 1 de xuño.

Que quere dicir co título da súa conferencia: "Se non hai marca, non hai país"?

O título é xa unha declaración de intencións. De feito, a idea de marca é indisoluble da de país. Un país é á vez unha idea, unha realidade física e unha emocionalidade vinculada ao anterior. E unha marca ten un sustrato físico porque ten como etimoloxía o significado de provincia. O boom do márketing no século XX parece que só foi tarefa dese século. Pero realmente, o márketing como tal existe dende hai miles de anos. Nos nosos países parece que a publicidade fora unha ferramenta "nova" para difundir a reputación dun país ante a xente no exterior. Nada máis equivocado. É importante a xestión interna e externa da imaxe de Galicia porque mercamos clixés como a tecnoloxía alemá ou a precisión suíza. A nivel interno, ter unha marca é tan importante ou máis para Galicia. O futuro é tamén un estado de ánimo.

Fáltalle marca a Galicia?

Non lle falta porque a marca existe. Pero pódese xestionar mellor. A nosa proposta é a de crear dun Banco Nacional de Capital Simbólico para xestionar os símbolos do pasado e ser proxectados para ser vistos. E para iso, propomos o método dos COCOS: concebir, construír, coordinar e conquistar.

Cales son as claves para crear un concepto de "país"?

A primera das claves é que "todo comunica": a cultura, os símbolos, os lugares, as paisaxes. Hai que saber xestionar a simboloxía do país. A realidade física complétase coa simbólica. En Galicia deberiamos estar orgullosos de ser emprendedores. Se existe o soño americano, ¿por que non ter un soño galego? Outra clave é non considerar só a simboloxía do pasado, senón tamén a futura. Se só nos centramos nas gaitas ou no pulpo, nunca daremos a idea que queremos para o futuro.

Hai símbolos nacionais que se repitan até converterse en clixés que sempre funcionan?

Claro, cando se pensa en Galicia sempre se che vén á cabeza a verde, o mar, a gaita, un dos iconos máis fortes, aínda que non é a mesma gaita a do fogueteiro que a de Carlos Núñez. Son clixés a morriña, a retranca ou aquilo de que non sabemos se subimos ou baixamos.

Bap&Conde creou a nova campaña de Política Lingüística co lema "En galego tes todo por dicir (E logo!), unha aposta de futuro.

Do que se trata é de retratar a iconografía real de Galicia. Buscamos ­unha estética que sexa comprable pero tamén cunha linguaxe de futuro. O de Todo por dicir e a estética do E logo! significa que hai que ter sempre autoestima. De feito, a nós coñécennos como os cocos galegos.