Os arqueólogos só atopan ósos de osos nas covas do Courel

Raedeira do Paleolítico atopada nas excavacións de Monforte

O grupo de arqueólogos que traballo en Seoane e Folgoso do Courel recolleu onte as súas ferramentas tras tres semanas de traballo de campo na Cova do Sato, sen que atopasen indicios de ocupación humana prehistórica. Os investigadores valoraron a aparición doutros restos animais como ósos e dentes de oso e sedimentos do Paleolítico, que servirán para coñecer a flora e a fauna que habitaba daquela na área e facer unha reconstrución ambiental do Plistoceno na Galicia oriental.

Os traballos realizados consistiron nunha cata no exterior da entrada da cova e tres no interior. Nun primeiro nivel, acháronse restos de cerámica e dun fogar e en prospeccións máis profundas apareceron vestixios do Paleolítico: ósos fracturados e con marcas de mordeduras.

Ademais dun cranio e un dente pertencentes a un oso, o resto de elementos desenterrados deberán ser analizados en laboratorio para a súa posterior clasificación. Estes descubrimentos poñen de manifesto que a cova serviu de cubil a animais carnívoros.

Os arqueólogos tamén estudaron outras quince covas que presentaban características apropiadas para a ocupación humana e determinaron un par de cavernas que aínda non foran catalogadas, entre elas a Cova do Solar en Lousada. As escavacións nestes lugares faranse o próximo ano e agora a catalogación continuará no laboratorio.