O colectivo de autores Polaqia foi o gañador do Premio Ourense de Banda Deseñada 2007, que todos os anos outorgan a Casa da Xuventude de Ourense e a Concellería de Cultura, como paso previo á celebración das Xornadas de BD de Ourense, o máis veterano evento sobre a novena arte de Galicia.

Polaqia, un grupo formado hoxe por David Rubín, Emma Ríos, os irmáns Sergio e Hugo Covelo, Diego Blanco, Kike Benlloch e outros creadores, naceu hai seis anos para permitir a autoedición de banda deseñada. Con este premio, os organizadores pretenden "destacar a importancia do movemento da autoedición como dinamizador do panorama da historieta galega, ante a falta de iniciativas das editoras profesionais. Estes autores crearon un espazo propio que demostrou non só a existencia de talento, senón tamén a viabilidade das edicións de historietas".

Polaqia acaba de recibir este ano o premio ó mellor fancín do Saló del Cómic de Barcelona por Barsowia, a revista insignia do colectivo, que xa acadou o seu décimo número. Recentemente, lanzaron unha liña de novelas gráficas en castelán, Rompehielos.

O Premio Ourense entregarase na XIX edición das Xornadas de BD, que se celebrarán entre o 3 e o 22 de outubro. Este ano, os autores invitados serán Carlos Vermut (El bayán rojo), Pepo Pérez (El vecino) e Lola Lorente (colaboradora habitual do Fanzine Enfermo). Repetirase a miniexposición Delicatesse, dedicada esta vez a dez debuxos selectos do viveirense Diego Blanco.