O escritor Eduardo Fernández reivindica nun libro a orixe exipcia de boa parte dos dogmas asumidos polo cristianismo

Eduardo Fernández comezou de moi novo a ler e investigar sobre o antiguo Exipto, país ó que viaxou moito

"O catolicismo do Vaticano non ten nada que ver co cristianismo primitivo. O catolicismo tomou dos ritos faraónicos a parte máis epidérmica, superficial, a parafernalia dos rituais, sen chegar a entender o fondo, o significado das crenzas exipcias". Así o afirmou o escritor e pintor coruñés Eduardo Fernández, autor de Dioses y Faraones. Misterios de la religión egipcia, unha obra que acaba de chegar ás librarías da man da editorial Cydonia.

O libro recolle "narracións curtas nas que hai unha miscelánea de temas do antigo Exipto. Non fala só de relixión, senón tamén doutros aspectos, como a política. Ademais, nas súas páxinas conecto o compoñente político e social coa realidade actual", explicou Fernández nunha entrevista.

O ensaio é froito de "lecturas e viaxes. Desde moi pequeno comecei a interesarme polo antigo Exipto. Estudei os tratados dos mellores exiptólogos, visitei os museos máis importantes, e realicei moitas viaxes a Exipto, de mes ou mes e medio. Ademais, no ano 1999 xa publiquei un libro sobre o tema, Entre las ruinas de Egipto, nunha editorial virtual americana", lembrou.

"Despois de tanto ler, unha vez que chegas alí, a Exipto, o que máis che impacta é a escala, o tamaño, dos monumentos. Pero tampouco cambia tanto a visión que xa te compuxeras a través dos libros", asegurou.

Eduardo Fernández defende a "veracidade" da súa obra, a pesar da súa "paixón" polo antigo Exipto, e do feito de non ser un exiptólogo no senso académico do termo. Unha parte do contido do libro procede dunha serie de colaboracións que realizou para o programa de televisión Millenium.

Dioses y Faraones. Misterios de la religión egipcia defende a orixe exipcia de moitos dos principios fundamentais do cristianismo. "No capítulo 125 do Libro dos Mortos está o xuízo final. O deus Osiris dá paso á eternidade a quen se comportou ben en vida. Disto ven o paraíso cristián. O monoteísmo procede da revolución de Akhenatón, que rompe cos deuses e di que hai un só Deus, Atón, cuxa máis clara manifestación é o sol. Ese Deus tería creado a vida, e sería igual para todos os seres da terra", comentou Fernández.

"A trinidade cristiá tamén procede das triadas exipcias. A figura de Xesús mesmo é unha copia do deus Osiris. A anunciación de María está descrita no templo de Hatshepsut, Dheir-el-Bahari", engadiu.

A relixión era daquela, "como agora, un modo de manipular e someter a xente, atemorizándoa co castigo divino", pensa este autor.