Unha enorme masa de plásticos luxa o Océano Pacífico

A mancha de lixo do Pacífico, unha xigantesca "sopa de plástico" cun tamaño dúas veces o territorio de EEUU, crece a pasos axigantados, segundo denunciou o científico que a descubriu. Charles Moore, oceanógrafo estadounidense e creador da Fundación de Investigación Mariña Algalita, dixo que "ninguén pode limpala e a mancha segue aumentado".

Nas costas de Xapón, os científicos descubriron que cada dous ou tres anos o número de partículas de plástico na auga se multiplica por dez, explicou Moore. "Na área que nós estudamos atopamos agora tres veces máis partículas que hai dez anos", dixo o científico, que descubriu casualmente a mancha en 1997 durante un cruceiro entre Os Ánxeles e Hawai.

Esta xigantesca superficie de lixo, que Moore prefire chamar "sopa de plástico", está formada por pequenas partículas de plástico, uns cen millóns de toneladas de desperdicios, segundo os cálculos de Moore. A "sopa" esténdese fronte á costa californiana, rodea Hawai e chega ata Xapón.

O principal problema é que "non se pode limpar porque hai demasiada distancia entre os seus extremos" e a área total é inmensa. "Atopamos partículas de plástico ata a 10 e 30 metros baixo a superficie".

Neste enorme vertedoiro aboian todo tipo de obxectos "como cepillos de dentes, envases de xampú, plumas estilográficas". Con todo, a maioría do plástico que acaba no mar crébase en pequenos anacos por efecto do sol e mestúrase coa auga e o plancto. Os efectos desta mestura son devastadores para o hábitat mariño.

"Toda a cadea alimenticia vese afectada", sinalou Moore. Os anacos de plástico máis grandes "poden parecer ademais calquera tipo de comida, como lura ou ovas de peixe". "Hai animais como o albatros ou a tartaruga mariña que están comendo moito plástico", lamentou Moore.

Para o científico estadounidense, trátase "dun problema que ten que ver coa globalización dos produtos" porque "todo está empaquetado en plástico".

Tampouco está limitado só ó Océano Pacífico, xa que hai vertedoiros similares, aínda que máis pequenos, en case todos os mares do mundo. "En cada océano hai sistemas de alta presión que contribúen a que se acumulen os refugallos", dixo Moore, que afirma que se trata "dun problema mundial".

Moore reclamou "máis opcións para que a xente poida reciclar" e que a industria asuma a responsabilidade de crear xeitos de colleitar o plástico inservible.