Xoves 02.09.2010
| Actualizado 18.54
Hemeroteca web
|
RSS
RSS
|
Unhas cincocentas librerías galegas están a afrontar problemas económicos por mor de débedas contraídas pola Consellería de Cultura e que ascenden a case medio millón de euros en concepto de compra de libros destinados á dotación de fondos da rede de bibliotecas galegas.
Así o confirmou o coordinador da Federación de Libreiros de Galicia, Antonio Fernández Maira, quen asegurou "o momento de preocupación que viven moitos" por mor das "débedas recoñecidas e impagadas" por parte da Administración pública. A situación remóntase ao ano pasado cando a Consellería de Cultura tomou a decisión de mercar parte dos fondos para encher a rede de bibliotecas galegas en librerías pequenas, para así compensar parte das perdas ocasionadas pola gratuidade dos libros de texto en distintos graos da educación pública, a establecementos, na súa maioría, de carácter familiar. Unha decisión que foi aplaudida polo sector. O problema chegou despois, cando, segundo os libreiros, pasaron os meses, e arestora, as cantidades aínda non foron aboadas.
Fernández Maira recoñece que "é difícil saber o número exacto de librerías afectadas, dado que algunhas están fóra da Federación, pero andan polas cincocentas", e asegura que hai cerca dun milleiro de facturas impagadas, algunhas das cales por cantidades que chegan aos 15.000 euros, "cifras -di-, que nas contas de negocios pequenos supoñen buracos de grandes dimensións". Maira recorda ademais que nas vendas para bibliotecas, o sector aplica un 15% de desconto, "pero aos provedores hai que pagarlles".
"Hai xente que non pode esperar nin un día máis", laméntase un libreiro compostelán cuxa libraría é unha das afectadas pola debeda e que prefire manter o anonimato. "A medida foi boa pero algúns de nós estamos pensando, vistos os problemas, en non volver participar de iniciativas semellantes", di. "Queremos unha solución xa".
Cultura admitiu onte a existencia destas débedas e asegurou que "a principios de mes se comunicou que en poucas semanas se procedería ao pagamento". Recoñeceron atrasos administrativos xa solucionados e lembraron que as achegas para facer fronte ás compras chegaron en virtude dun convenio co Ministerio de Cultura asinado o pasado outubro. Os libreiros desconfían deste novo prazo, posto que, no seu día, "dixéronnos que en febreiro e agora -din-, estamos xa en maio".
A Consellería recoñece os atrasos, que solucionarán "en poucos días"
Dentro das medidas desenvolvidas polo departamento que dirixe a nacionalista Ánxela Bugallo para fomentar a actividade da lectura estaba a dinamización da rede galega de bibliotecas. Con este fin, través do programa de promoción do libro en galego, procedeuse á adquisición con fondos da propia Xunta de obras en língua galega.
O pasado outubro a Consellería asinou un convenio de colaboración co Ministerio de Cultura para a adquisición de máis fondos bibliográficos. Segundo os datos da propia Xunta entre as dúas administracións achegáronse case tres millóns de euros, dos que 1,2 están adicados á mellora e provisionamento de libros nas salas de lectura. Por unha banda, distribuíronse os fondos bibliográficos que conservaba a Consellaría, promocionouse o libro en galego co reparto de exemplares e cofinanciáronse cos concellos as adquisicións de novas obras para os seus centros. A Consellería recorda que se decidíu mercar os fondos en librerías pequenas como medida para axudar ao sector do pequeno comerco galego. Recoñeceron problemas co convenio e aseguraron que o pagamento se levará ao cabo "en poucos días".
