Promesa incumprida

A Coordinadora de Traballadores de Normalización da Lingua (CTNL) denunciou onte nun comunicado de prensa que a propia secretaria xeral de Política Lingüística, Marisol López, lle confirmou que decidiu paralizar a creación do Consorcio para a Planificación Lingüística, "incumprindo un acordo parlamentario".

Pola súa parte, este departamento confirmou onte que decidiu adiar a creación do Consorcio "logo de non acadar a unanimidade de todos os organismos convidados a formar parte do mesmo nos contactos e xuntanzas mantidas pola secretaria xeral, Marisol López, cos representantes deses organismos."

O proxecto do Consorcio prevé, para a súa constitución, a participación da Xunta de Galicia, dos concellos das sete cidades galegas, das catro deputacións provinciais e da Federación Galega de Municipios e Provincias. "Esa participación non foi, ata o de agora, subscrita por todas as entidades citadas, polo que a Secretaría Xeral continuará negociando para que se produza a adhesión de todas elas", sinalou onte Política Lingüística na nota.

Segundo a Coordinadora, a Xunta desviará para outras accións os fondos asignados á creación deste organismo, que estaba orzamentado e que tería como obxectivo o impulso institucional e social do uso da lingua galega. Indican que a creación do Consorcio se incluíu nos orzamentos da Xunta apara 2007 e que coa non creación deste organismo Política Lingüística segue a incumprir a súa función de coordinar o labor dos servizos de normalización doutros organismos.

A Coordinadora afirma, pois, que informará o presidente da Xunta do malestar por este asunto entre o colectivo e remitiralles aos tres grupos do Parlamento Galego un documento explicativo e un dossier con toda a información para pedirlles que controlen a acción executiva e que teñan en conta o incumprimento dun mandato parlamentario por parte dun departamento da Xunta.