"Síntome ferido"

Juan Cruz asegura que el sempre respecto e admirou a Literatura galega

"Ferido". Así é como se sente o escritor e periodista Juan Cruz tras a publicación dun comunicado do PEN Clube de Galicia onde se lle facía responsable das desprezativas declaracións de George Steiner sobre o galego e a súa Literatura. No comunicado da dirección do PEN, reproducido o venres no apartado A opinión da sección de maré, subliñábase que "Juan Cruz aproveitou as declaracións de George Steiner para botar leña ao lume na actual situación lingüística e literaria no Estado das Autonomías, co Manifiesto por la lengua común como pano de fondo".

Esa acusación, indicou onte Juan Cruz por teléfono, "é inxusta para min e para calquera periodista: É unha falta de respecto ao exercicio periodístico. As palabras son de Steiner, non miñas". Manifestamente contrariado pola polémica, Juan Cruz rexeita estenderse nas súas declaracións: "¡Que me veñan dicir isto a min, tan respectuoso sempre coa Cultura galega e cos seus esritores des que empecei na miña vida a relación coaLietratura galega a través de Cunqueiro ou de Torrente Ballester...!".

"O único que quero dicir", engade, "é que ese comunciado manipula dunha maneira perversa [el utiliza a palabra castelá torticera] esa conversa. Nela, actuei como actúa un persiodista: preguntando. E ata que o PEN Clube, ao que lle teño o máximo respecto como institución, non diga que en efecto manipulou esa conversa para que a opinión pública tivese unha versión torta do ocorrido, creo que non debo falar máis".

O presidente do PEN, Luís González Tosar, distribuíu a través da súa habitual colaboración semanal para a axencia AGN un texto -titulado O de Marras- no que incide sobre as acusacións vertidas xa no comunicado da organización.

"Agora, nunha entrevista que lle fai a un vello arroutado, exemplo do intelectual francés, unitario sobre todo, demostra quen é: un pagado de si, desleal, abusador cos de abaixo. E aínda así haberá algún arrastrado que o convide a estas provincias. Certo que a literatura é ben xenerosa", conclúe González Tosar nun artigo callado de lidezas para o autor canario. A polémica arrinca dunhas declaracións de George Steiner nas que se espantaba porque o galego se ensinase na Universidade cando, ao seu xuízo, non é un idioma merecente dese rango, cun nivel moito máis inferior ao do catalán. O último ensaio de Steiner -en galego titularíase Os libros que nunca escribín- aparecerá publicado en castelán e catalán.