Denuncian o "racismo lingüístico" en Europa

As entidades integrantes da Axencia Europea para as Linguas Minorizadas concluíron tras a reunión do Consello Xeral celebrado a semana pasada en Polonia que "se está a producir unha repunta do racismo lingüístico" nos países europeos. Segundo explicou o presidente da Mesa pola Normalización Lingüística e presidente do Comité desta axencia europea en España, Carlos Callón, en España "existen grupos de poder" que desenvolven discursos "contra as linguas galega, catalá e vasca", o que ao seu xuízo, se trata dunha situación de "racismo lingüístico". Así, nas conclusións pactadas polas organizacións recóllese que "se está a producir unha repunta da xenofobia e o racismo" a escala europea así como "unha repunta na incomprensión cara ás linguas". Entre os obxectivos propostos pola Axencia Europea para as Linguas Minorizadas, o organismo pretende en primeiro lugar que a ONU recoñeza a Declaración Universal dos Dereitos Lingüísticos, acordada en 1996 e aprobada no Congreso de España.