"O maior galardón son os lectores"

Fernández Paz xa fora varias veces finalista do Premio Nacional FOTO: JULIAN MARTIN/efe

O escritor Agustín Fernández Paz acadou onte o Premio Nacional español de Literatura Infantil e Xuvenil 2008 por O único que queda é o amor, editado por Xerais e dotado con 20.000 euros. Fernández Paz (Vilalba, 1947) recoñeceu a satisfación do novo galardón, se ben "o maior galardón" provén do recoñecemento dos lectores.

Fernández Paz, unha verdadeira institución do xénero en Galicia e unha figura a escala internacional, non comparte "a visión negativa sobre relación dos mozos coa literatura", senón todo o contrario: "Dise que no pasado os mozos lían máis, pero coa actual democratización da educación, hai un grupo de lectores magníficos e outro grupo que busca libros que encaixen con eles. Aí entra o papel do mediador en bibliotecas e centros, que debe ofrecerlles camiños. Existe unha potencialidade latente de lectura".

Ante o feito de que varios autores galegos foron galardoados nos últimos anos co Premio Nacional de Literatura Infantil e Xuvenil, Agustín Fernández Paz opinou que responde a varias xeracións de autores "cun traballo que paga a pena".

En O único que queda é o amor, o autor chairego intenta darlle outra contribución ao estímulo do acto da lectura. A obra é unha colección de dez contos que viran en torno ó "amor entre persoas" e ó "amor ós libros porque os personaxes se senten moi influídos por autores". Todos os contos comezan cunha cita (de escritores como Orhan Pamuk, José Ángel Valente ou Pablo Neruda) e nos textos hai referencias poéticas, literarias e cinematográficas. "En todos os meus libros hai un personaxe que le e de certa forma, cando cito os autores, pretendo animar o lector a buscar outros libros e tamén películas", afirmou o escritor galego, que ten entre as citas da obra unha frase de Joan Margarit, Premio Nacional de Poesía este ano.

Finalista do Premio Nacional noutras ocasións, Fernández Paz declarou que "sempre foi unha fortuna" quedar no tramo final deste galardón. "O libro está feito cos fíos da vida e ten unha dose de verdade e emoción que quizais poida tocar xurado este ano", supuxo.

Aínda que se trate dun libro xuvenil, Fernández Paz non cre que o sentimento adolescente sexa, como se di, "o máis estrañado". "O amor, a calquera idade, ten unha facultade esencial que é a de poder cambiar a nosa vida. É un tema inesgotable", xustificou.

Case todas as dez historias do libro son recordadas polos seus protagonistas anos despois e percórreas unha sensación de nostalxia e de perda. As ilustracións de Pablo Auladell, feitas con lapis e acrílico, remiten a recordos nostálxicos ou de soños.

O escritor obtivo, entre outros, o premio Merlín de literatura infantil en galego (1989), o Lazarillo (1991), o Premio da Asociación de Escritores en Lingua Galega (2204) e o Edebé de Literatura Xuvenil (2005). "Con todo, apetecíame ter tamén o Premio Nacional de Literatura Infantil e Xuvenil, que ten un xurado moi valioso", dixo.

O seu próximo traballo, adiantou, tratará o tema da inmigración e titularase Lúa de Senegal. "Sairá posiblemente no mes de marzo, primeiro en galego e posteriormente en castelán", detallou. A novela conta a historia dunha nena que vén a España a vivir co seu pai, un inmigrante senegalés, e ten que adaptarse ó novo colexio e á vida europea. "A lúa é o único que ela atopa en común entre o seu país e España", dixo, xustificando o título.