O escritor estadounidense John Updike, eterno aspirante o Nobel e autor da serie de novelas sobre Coello, morreu onte ós 76 anos tras anos de loitar contra un cancro de pulmón. Foi un dos intelectuais máis influentes do século XX en Estados Unidos, ao que lle tomou o pulso a través dunha crónica apaixonante desde a Gran depresión. Updike naceu en Shilligton (Pensilvania) o 18 de marzo de 1932. Estudou na Escola Superior de Shillington e na Universidade de Harvard, e desde 1955 a 1957 foi reporteiro da revista New Yorker, onde desenvolveu un estilo punxente e sarcástico co que describía os vicios e virtudes da vida cotiá americana.

No 1957 fixou a súa residencia en Ipswich (Massachusetts), onde escribiu gran parte da súa produción. Pouco despois, publicou a primeira novela Corre, Coello, que máis tarde se convertería na primeira dunha serie. Nela aborda a problemática do "home medio" a través do seu personaxe, Harry Angstrom. Os outros títulos son O regreso de Coello, Coello é rico e Coello en paz (1991). En O Centauro (1963), gañador do National Book Award, explicaba a través dun adolescente as sensacións e sentimentos provocados por unha enfermidade como a psoriase.

No 1967 foi galardoado co premio O"Herry Story, e en 1982 co do Círculo Nacional de Críticos Literarios, pero un dos máis importantes foi o Premio Pulitzer, que conseguiu ese mesmo ano, con Coello é rico. E por segunda vez, en 1991, con Coello en paz. Posteriormente, tamén levou o premio do Círculo da Crítica Literaria de Estados Unidos, na categoría de ficción, por Coello en paz, a última novela da serie, onde a enfermidade e morte do personaxe central, Harry Angstrom, ilustra o declive dos Estados Unidos.

Ó longo de varios anos figurou o seu nome entre os candidatos ó Premio Nobel.

Unha das súas obras máis populares é Parellas (1968), que nos anos sesenta permaneceu bastante tempo entre as listas dos libros máis vendidos. Nesta novela analiza o comportamento dalgunhas parellas dos sesenta, pioneiras na fronteira do sexo e na promis- cuidade.

En 1996 publicou tamén A beleza dos lirios, onde unha vez máis mostra á clase media norteamericana, ó longo de catro xeracións dunha mesma familia e co mundo do cine como pano de fondo.

Na súa longa produción, figuran títulos como A feira do asilo (1959), Arredor da granxa (1965), As bruxas de Eastwick (1984), que foi levada ó cine, S (1988) ou A versión de Roger (1989).