A rede, co poeta do Courel

Uxío Novoneyra traballando no lousado da súa casa do Courel FOTO: Axencias

O colectivo de amigos que hai dous anos creou na rede unha web para recabar sinaturas co fin de que a Real Academia Galega (RAG) lle dedique o Día das Letras Galegas de 2010 a Uxío Novoneyra, entregoulle o martes ao presidente da RAG, Xosé Ramón Barreiro, as adhesións de 1.041 persoas que apoian a iniciativa. "Non pediamos resposta, senón que se lle transmitise a todos os académicos no momento de escoller o candidato para o próximo 17 de maio. Barreiro así nolo confirmou, aínda que indicou que tamén había outros candidatos", sinalaron onte a este xornal os impulsores do portal www.uxionovoneyra.com, que prefiren permanecer no anonimato.

Xunto aos nomes da xente que respalda a proposta, tamén se inclúe un dossier coas mensaxes que enviaron non só dende Galicia senón dende países de todo o mundo como México, Portugal, Arxentina, Francia, Estados Unidos, Brasil ou Colombia. "Moitos dos galegos que deixaron o seu apoio na web son profesores, máis que escritores, o cal é alentador porque iso tamén quere dicir que lles falan de Novoneuyra aos seus alumnos", resaltan. Ademais, consideran que conseguir máis de mil apoios a través dunha web en internet é un logro xa que "é difícil que se difunda".

Así, apoian a proposta creadores como o arxentino Juan Gelman que recibiu o Premio Cervantes en 2007 ou os galegos Perfecto Conde, Luz Darriba, Concha Rousia, Xurxo Lobato, Xosé A. Neira Cruz, Xoán Abeleira, X.H. Rivadulla Corcón, Vicente Montoto, Séchu Sende ou Ramón Caride.

"É un gran poeta galego cunha obra indiscutible"

Esta acción para conseguir que o Día das Letras do vindeiro ano se lle dedique ao poeta nado en Folgoso do Courel, pouco despois de cumprirse dez anos da súa morte, non é inédita. "Hai precedentes con Otero Pedrayo ou Avilés de Taramancos", apuntan. Pero tamén hai un monte de razóns que xustifican a necesidade desta homenaxe. "É un dos grandes poetas galegos cunha obra indiscutible, na que a calidade supera á cantidade", salientan.

A isto engaden os vínculos da súa terra natal coa capital galega. "É o poeta do Courel, porque nos descobre o seu espazo en todos os seus poemas pero tamén de Compostela, onde viviu bastante tempo, e que ligaba co Courel xa que detrás da súa casa no Burgo pasaba un regueiro que lle lembraba á paisaxe do Courel".

As mensaxes presentadas na rúa Tabernas resumen a emoción e admiración de máis de mil persoas ante o autor de Os Eidos (1955). Xunto a opinións directas como "as letras galegas están na poesía de Uxío Novoneyra" ou "adiante, teno merecido", tamén hai outras máis elaboradas como "beber da fonte de Novoneyra , é beber de moitas fontes nobres nas que el alimentou o seu gran legado. Dedicarlle as Letras Galegas no 2010, será unha boa forma de manifestar o noso agradecemento por todo o seu esforzo na procura e na defensa da nosa identidade".

Segundo informan, volverán ofrecer novos datos da iniciativa a partir de maio, xa que a web continúa recibindo novos apoios.