"Na Galiza, nasaliza!, na-sa-liza, em galego!"

"25 de Maio, saimos do armário!". "Lusofobia, Nunca Mais!" "Na Galiza, nasaliza!" "Na-sa-liza, em galego!" e "Toalha, toalha, toalha contra Espanha!". Con frases coma estas, un grupo duns 80 lusistas e reintegracionistas reivindicaron onte o orgullo de selo na Praza do Pan de Compostela.

A Norma do Mundo é Nossa (com reintegrata não há quem possa) foi desta volta o lema do Dia do Orgulho Lusista e Reintegrata, que se celebrou por terceiro ano consecutivo en Santiago, coincidindo coa data na que fans de Douglas Adams de todo o mundo levan enriba todo o día unha toalla en homenaxe ao creador da serie de ficción científica O Guia do Mochileiro das Galaxias.

O actor, director e narrador Quico Cadaval e a xornalista e actriz Comba Campoy fixeron de "mestres de cerimonias" neste acto.

Cadaval chanceou co descoñecemento que existe en Portugal sobre Galiza e a súa lingua e coa teima dalgúns galegos en marcar distancias entre o galego e o portugués, -polo que se referiu ao escritor Xosé Luis Méndez Ferrín e lembrou que tamén hai diferenzas entre o galego das distintas zonas do país-. Non faltaron no seu improvisado discurso as brincadeiras sobre Gloria Lago: "Aos reintegracionistas odíannos os españois, os portugueses e os galegos. Os portugueses non poden aceptar que a súa lingua naceu en España. Por iso, estou convencido de que Gloria Lago está pagada polo Instituto Camoes", e Ramón Piñeiro: "Chufárono como filósofo porque o país é pequeno e temos que amañarnos co que temos".

Cadaval e Campoy leron poemas de Carlos Drumom de Andrade e Xose Luis Peijoto, e o angolano-portugués Paulinho Oliveira realizou a súa achega rapeando.

Quico Cadaval tamén bromeou sobre a marxinación á que as principais institucións da lingua e a cultura do país adoitan someter o reintegracionismo e o lusismo, e pediulles "unha moratoria de dous anos" na que pasasen a utilizar a "verdadeira norma do galego que é a que teñen en Brasil ou en Portugal".

Como nos anos anteriores nos que se celebrou o Dia do Orgulho Lusista e Reintegrata, os participantes corearon as consignas e cantaron pezas como Tu que és tão "guapa" e tão lista Tu, que mereces um reintegracionista, ficas ao meu lado e o mundo parece mais amável, mais humano em reintegrado, mentres daban voltas arredor da fonte da Praza do Pan, ou Praza de Cervantes, coas súas toallas ben visibles, como correspondía á ocasión.

A festa continuou, despois, no centro social O Pichel.