Cen directores denuncian a “chapuza xurídica” da ‘consulta Vázquez’

A asemblea da CIG-Ensino

Máis de cen membros de equipos de dirección dos centros educativos de toda Galicia solicitáronlle onte a Educación ser "eximidos da responsabilidade" de custodiar e aplicar a enquisa sobre o uso das linguas no ensino, un traballo que consideran "alleo aos nosos cometidos".

Reunidos no IES Xelmírez I de Santiago nunha asemblea informativo convocada pola CIG-Ensino, os directores acordaron un texto no que rexeitan asumir "a vixilancia dunha chapuza xurídica que non cumpre ningunha garantía mínima". Denuncian ademais que a enquisa de Educación representa "un inquérito tendencioso que impide expresar a vontade dos que están a favor do ensino en galego".

Tamén critican que a posibilidade de achegar opinións se limite ás persoas que nestes momentos teñen fillos escolarizados, "cando o sistema educativo como servizo público, a normalización lingüística e o dereito a coñecer o idioma propio de Galicia son cuestións que afectan ao conxunto da sociedade".

O rexeitamento dos equipos directivos súmase así á cadea de reaccións contrarias á enquisa elaborada dende Educación, así como á circular enviada dende o gabinete que dirixe Jesús Vázquez co fin de "prohibir todas as actuacións ou actos a favor o en contra" da consulta. De feito, no texto acordado onte por consenso, os directores de centros educativos incidiron en que non se van deixar "intimidar polas ameazas ilegais dunhas autoridades educativas que perderon o seu carácter institucional para comportarse como axentes electorais dun partido político. Neste sentido esiximos a retirada das notificacións enviadas ao centro por represivas e ilegais", remarcan.

Acusan á Consellería de usar "de xeito partidista a educación e censurar opinóns diferentes á súa" así como de prohibir "que se dea información da propostas das organizacións sindicais e movementos de renovación pedagóxica, equipas de normalización lingüística, ANPAS, etc... contradicindo o que reflicten os preceptos legais de promoción e uso do galego recollidas na actual normativa.. "

Sosteñen que as indicacións da Consellería sobre a emisión de opinións en relación á consulta vulnera a súa liberdade de expresión e de cátedra. "Resulta paradoxal que se nos estean anunciando recortes na calidade do ensino (supresións de prazas, agrupamentos,...) coa escusa da crise e se leve a cabo este dispendio en recursos económicos para atacar a nosa lingua. Para diminuír a presenza do noso idioma no ensino non hai crise", conclúen.

É por iso que rexeitan a enquisa e reclaman "que se nos exima de responsabilizarnos deste traballo alleo aos nosos cometidos".

Ademais, A Coordinadora Galega de ENDL acompañou a un grupo de pais e nais de centros como o Emilia Pardo Bazán da Coruña que mostraron a súa preocupación ante "a actual situación e a perspectiva futura da lingua galega no ensino."

Fano un día despois de que se dese a coñecer a supresión do programa de innovación educativa de introdución do galego en contextos castelanfalantes. Segundo os informes elaborados polos propios centros, e a percepción das familias, os resultados acadados na consecución da competencia nas linguas oficiais son "altamente satisfactorios". Por iso, os centros educativos mostraron a súa "perplexidade" pola eliminación deste programa sen previa consulta aos docentes nin ás familias. Os pais destes centros mostraron a súa "indignación" ante este feito e reclamaron para os seus fillos "unha capacitación correcta en lingua galega, que algúns pais –castelanfalantes– non poden ofrecerlles porque no sistema educativo no que foron escolarizadas o galego estaba ausente."