Santiago Cortegoso gaña o Premio Dieste

O actor pontevedrés Santiago Cortegoso Calvar, coa obra 0,7 % Molotov, foi a gañador da XIV edición do premio de teatro Rafael Dieste, instituído pola Deputación da Coruña.

A resolución deuna a coñecer onte o presidente da institución, Salvador Fernández Moreda, nun acto que contou coa asistencia da deputada responsable da área de Cultura, Caridad González Cerviño, do comisario do certame, Antonio Simón, e dos membros do xurado Manuel Areoso, Elina Luaces, Alejandro Piñeiro, José Enrique Rivadulla e Teresa Moure, gañadora da edición do ano pasado deste galardón, un dos máis prestixiosos do país.

O premio, ao que concorreron 36 obras, conta cunha dotación en metálico de 6.500 euros e inclúe tamén a edición e posta en escena da peza teatral, que percorrerá varios concellos da provincia coruñesa, "o que supón unha importante proxección para a obra gañadora", subliñou Moreda.

O voceiro do xurado, Manuel Areoso, felicitou tamén o gañador, ao que cualificou como "un home de teatro dende hai moito tempo" e cualificou o texto como unha "interesante reflexión, cunha estrutura moi contemporánea, que é tamén unha crítica de valores que ultimamente se empregan como produto comercial, como a solidariedade ou a caridade".

Segundo explicou Areoso, a obra desenvólvese arredor de dúas personaxes "construídas sobre tópicos como a biodiversidade ou o emprego de enerxías renovables, pero cada tópico que engaden á súa personalidade é un paso máis cara á despersonalización".

O voceiro do xurado destacou, ao mesmo tempo, que a obra emprega "unha linguaxe sucinta, pero de alto nivel poético e dramático", e critica "unha solidariedade tópica para conciencias ben instaladas nunha hipotética sociedade do benestar".