Xoves 02.09.2010
| Actualizado 18.54
Hemeroteca web
|
RSS
RSS
|
A derrogación do decreto do galego "é un compromiso electoral" e "non ten volta atrás". O presidente do Goberno, Alberto Núñez Feijóo, deixou onte claro que desoirá as demandas da oposición, as asociacións de pais e os colectivos cidadáns que cren que os resultados da "consulta Vázquez" non xustifican a fin do decreto aprobado polo bipartito para que cando menos a metade das materias se impartisen en galego. "A derrogación do decreto non ten marcha atrás. É un compromiso electoral referendado nas urnas, e nos pobos democráticos os únicos que mandan son as urnas. Teño un compromiso e o vou cumprir. O que si me gustaría, e para iso facemos a enquisa, é acertar", asegurou.
Núñez Feijóo volveu interpretar, así, os resultados das eleccións, nos que BNG e PSdeG recibiron, xuntos, perto de 6.000 votos máis que o PPdeG, como un xeito de xustificar o cumprimento dunha promesa que fora formulada antes dos comicios, en confluencia coas demandas de UPyD, -un partido que podía restarlle votos pola dereita-, a asociación Galicia Bilingüe e outras organizacións apoiadas por medios de comunicación como El Mundo.
"Nós ppropoñemos a cooficialidade das linguas e o que está no Estatuto. Non hai que terlle medo á liberdade, por que a xente non vai opinar? Aprioristicamente, non teño nada máis que cumprir o Estatuto, a Constitución, e todo isto interpretalo no contexto da opinión dos pais", asegurou Feijoo.
O Estatuto di que "a lingua propia de Galicia é o galego. Os idiomas galego e castelán son oficiais en Galicia e todos teñen o dereito de os coñecer e de os usar. Os poderes públicos de Galicia garantirán o uso normal e oficial dos dous idiomas e potenciarán o emprego do galego en todos os planos da vida pública, cultural e informativa, e disporán os medios necesarios para facilitar o seu coñecemento. Ninguén poderá ser discriminado por causa da lingua", e que "lles corresponde ós poderes públicos de Galicia promover as condicións para que a liberdade e a igualdade do individuo e dos grupos en que se integran sexan reais e efectivas, remover os atrancos que impidan ou dificulten a súa plenitude e facilitar a participación do todos os galegos na vida política, económica, cultural e social", artigos que, segundo varias sentenzas do Tribunal Constitucional, avalan as políticas de discriminación positiva cara ao galego coas que os sectores sociais contrarios á normalización desta lingua tentan acabar.
Núñez Feijoo aclarou, porén, que está aberto a calquera posibilidade que sexa legal, e "a que no novo decreto haxa unha política similar á anterior". -Ata a aprobación do decreto do bipartito estivo en vigor outro do 1995 que non era, no seu contido, radicalmente diferente do do 2007-. Sobre o nivel de participación na consulta aos pais, -que Feijoo denomina "enquisa" malia non reunir os criterios científicos para selo- , comentou que "é moi similar a moitas contendas electorais. Non está mal, máis ou menos como o Estatut de Cataluña".
Non dixo nada, porén, das acusacións da oposición e dos sindicatos e colectivos sobre a falta de "rigor" e "validez" dunha consulta que nin fixo un deseño mostral segundo criterios científicos, nin garante que os mesmos pais non contestasen a varios cuestionarios nin que non fosen os fillos os que respondesen as preguntas. Sobre as galescolas, reiterou que o que se lles vai cambiar é o nome. "Non imos cambiar nada de roupas nin de mandilóns con bandeiriñas; imos manter os soportes das galescolas como están e o único que imos poñer é escola infantil onde pon galescola. Punto. Nada máis. Iso está medido e ten un custo inferior a unha das teas que se poñían nos edificios cando ía alí un representante do goberno anterior simplemente para dicir que se estaba facendo algo", respostou a unha pregunta sobre a posible contradición entre os cambios previstos coa política de austeridade.
IESGA cre que o goberno non debe facer "referendos absurdos"
A asociación estudantil IESGA manifestou nunha nota de prensa o seu "total desacordo coa enquisa sobre a lingua na escola" xa que, ao ver desta organización "progresista", segundo se define no comunicado, "é unha enquisa que carece de fiabilidade e validez, tanto a enquisa en si como o proceso e o tratamento e presentación dos resultados". "A participación dos pais e nais no ensino dos seus fillos non debe usarse de forma demagóxica para xustificar unha política lingüística que vai en detrimento do Galego", cre IESGA. A organización estudantil pide a "paralización da redacción" dun novo decreto. A coordinadora de Universidades de IESGA, Azucena Rodríguez, dixo que "aqueles que enchen a boca dicindo que a lingua non debe ser un elemento de confrontación son os primeiros que están traballando para que isto sexa así, a responsabilidade do goberno é a de defender e apoiar a nosa lingua, non facer referendums absurdos que carecen de sentido e validez".
Os Comités din que o PP obedece á "dereita española máis reaccionaria"
Os Comités -organización do estudantado galego que recolle a herdanza dos CAF e dos CAE- consideran "ilexítimos" os resultado da consulta sobre o uso do galego nas aulas e defenden que a fixación dos usos lingüísticos non é "competencia exclusiva de nais e pais", senón de "toda a sociedade". Os Comités cualificaron a consulta de "enganosa", e manifestaron que "non existe garantía de que os resultados non pasasen ningún filtro" para facelos á medida das necesidades do goberno". Ademais, mostráronse contrarios a que gastase "unha cantidade tan elevada" en facer unha enquisa con resultados que "xa todas e todos coñeciamos". "O goberno fixo esta consulta unicamente, e en palabras do conselleiro de Educación, Jesús Vázquez, para dar o primeiro paso na derrogación dun decreto que é a principal protección legal que o galego ten nos institutos de Galicia", manifestaron. Para rematar, os Comités recordaron que a Xunta "aínda non lle preguntou ao conxunto da comunidade escolar nin ao estudantado" sobre a súa opinión sobre o uso do galego nas aulas, e sostiveron que o PP "cumpre coas ordes da dereita española máis reaccionaria".
