Grupos galegos darán concertos en Portugal

O programa de intercambio musical entre a Rede Galega de Música ao Vivo e o circuíto portugués OTonalidades ofrecerá até decembro 47 concertos en localidades galegas e portuguesas. Participarán 11 grupos galegos e 6 lusos de diversos estilos.

Grazas a este circuíto conxunto, os grupos galegos Aló Django, Banda Potemkin, Bukowski Blues Trío, Carmen Dor, Coanhadeira, De Outra Margem, Lamatumbá, Modulok Trío, Portrait, Som do Galpom e Son+D2 protagonizarán un total de 25 actuacións no país veciño, mentres que os portugueses Comcordas, Olivetree, Samasati, Sofia Ribeiro, Taberna Revisitada e Uxu Kalhus realizarán 22 recitais en Galicia. O calendario de actuacións dará comezo este venres.

Na presentación do intercambio o director de Agadic, Fernández Fasero, anunciou a presenza dunha importante representación de empresas e artistas da comunidade nas próximas citas internacionais do sector: World Music Expo en Copenhague e Buenos Aires Feria Internacional de Música.