Ánxeles Cuña: “O Fito é un referente en Galicia”

Compañías procedentes de Arxentina, Chile, Brasil, Italia, Portugal e España participarán do próximo 24 de outubro ó 1 de novembro no II Festival Internacional de Teatro de Ourense (FITO), que se celebrará do 24 de outubro ó 1 de novembro. A compañía Atalaya, que recibiu o Premio Nacional de Teatro 2008, participará neste certame cultural na cidade de Ourense. Os compoñentes da compañía andaluza porán en escena a obra A ópera dos tres centavos o próximo 25 de outubro no Auditorio Municipal a partir das 20.30 horas. A Universidade de Vigo, o Concello de Ourense, o Teatro Principal, a Xunta de Galicia e a compañía Sarabela Teatro impulsarán un festival que contén unha programación ampla e variada. Os seus representantes compareceron onte nunha rolda de prensa que tivo lugar no Auditorio Municipal de Ourense para presentar a programación do II Festival Internacional de Teatro de Ourense.

A directora de Sarabela Teatro, Ánxeles Cuña, asegurou que o Festival Internacional de Teatro de Ourense busca converterse na súa segunda edición en "referente para toda Galicia", cunha programación que cualificou como "saborosa, potente e coherente" que pretende satisfacer ata os amantes do teatro clásico, xa que se revisarán tres clásicos dende unha visión contemporánea".

Cuña destacou a representación de Ibeoramérica a través de 5 espectáculos "extraordinarios". De feito, explicou que o FITO contará co "melloriño de Arxentina con dous grandes nomes da escena con recoñecemento internacional" como Daniel Veronese e Rafael Spregelburd, que foron "multipremiados pola Casa das Américas e con máis de trinta premios con status moi forte". Como representación galega actuarán no FITO as compañías Matarile -próximo 1 de novembro no Auditorio-, Teatro Nu -próximo 26 de outubro no Auditorio- e Os Perqtores de Seixalbo -coa obra Percusión, o 24 de outubro na rúa do Paseo-.