Cineuropa exhibirá este novembro 160 filmes, 18 en primicia

José Luis Losa (dereita), Socorro García e Paulo Rodríguez durante a presentación de Cineuropa

Unha das citas máis agardadas do outono cultural compostelán, o Cineuropa, comeza o próximo mércores coa película gañadora da Palma de Ouro no Festival de Cannes, A cinta branca, que abrirá unha augación de proxeccións ata o dous de decembro. En 28 días proxectaranse 60 películas. Na sección oficial, destacarán nomes como o de Haneke, pero tamén Manuel de Oliveira ou Carlos Saura, entre os veteráns. Os directores Novísimos contarán cun apartado propio de concurso, no que o público poderá descubrir cintas como Los Condenados de Isaki Lacuesta ou Tres días con la familia de Mar Coll. Ademais, na edición deste ano, recoñeceráse co Premio Cineuropa o labor e relevancia no panorama audiovisual de Mabel Rivero e máis de Fernando Trueba.

Haberá lugar ademais para os directores galegos. Así, a sección específica Audiovisual Galego completarase con sesións especiais dedicadas á filmografía dos emerxentes Oliver Laxe, Xose Manuel Bazarra, Caludia Brenlla e Ángel Santos. Tamén se organiza unha Noite Especial Crebinsky, coa estrea da primeira bobina da película en 35 mm. Nas seccións tradicionais, o espazo Mundo Asia dedicará unha atención especial a Takeshi Kitano, coa proxección de cinco filmes do cineasta xaponés. A Retrospectiva volverá a mirada cara aos cineastas Arnaud Despechin e Claire Denis, dous nomes capitais do movemento denominado contraonda. Como cada ano, non pode faltar tampouco a tradicional Maratón, un reto para cinéfilos que culminará cun filme sorpresa.

Ao apartado xa consolidado dedicado ao documental musical, Doc-Music, únese este ano unha maior atención á música, con sesións especiais protagonizadas pola filmografía oficial dos Beatles. Títulos como A hards day"s night, Yellow Submarine ou Magical Mystery Tour estarán acompañados nesa selección por rarezas difíciles de contemplar sobre o mítico grupo, coma o seu directo no Shea Stadium de Xapón ou a intervención do conxunto no programa televisivo de Ed Sullivan. A homenaxe videográfica, unirase tamén un concerto especial na sala Capitol, dedicado aos de Liverpool. Coa presentación de Camilo Franco, o 10 de novembro soará a música de grupos como Faltriqueira, The Homens ou Niño y Pistola.

Haberá tamén outra estrea nesta 23 edición do festival. O libriño co programa e fichas de todos os filmes será por primeira vez de pago, iso si, cun prezo simbólico de cincuenta céntimos. Deste xeito, preténdese racionalizar tanto o uso por parte dos espectadores como a xestión dos recursos do festival. Polo demais, a entrada puntual para cada película custará 3 euros, mentres que o abono para dez proxeccións terá un prezo de 20 euros. Os asiduos que escollan esta segunda opción, levarán ademais o libriño de balde.