Reinventar Auria

Con motivo do 50 aniversario da publicación de A esmorga de Eduardo Blanco Amor, a editorial Difusora de Letras, Artes e Ideas, está a desenvolver un programa de actividades culturais encamiñadas á "revisión actualizadora polos novos creadores e as novas linguaxes artísticas da obra e as facetas" do escritor ourensán e "impulsar o coñecemento" a partir do seu universo.

Entre as accións, mañá, liberaranse exemplares da novela en espazos públicos de Ourense, en colaboración co Gremio LiterAuria de editores, libreiros e escritores da cidade. No ámbito literario, acábase de editar unha obra que dá entrada a diferentes textos e accións vinculadas con A esmorga, vista a través da banda deseñada, o xogo de rol, o ensaio, a música, os títeres ou o deseño gráfico.

Con guión de Carlos Rafael Ramos e ilustracións de Jaime Izaguirre, faise unha relectura en BD dos tipos sociais e dos espazos da novela. Tamén se fai un percorrido histórico da Auria retratada por Blanco Amor á cidade actual. Pola súa parte, Álex Mene -autor da única tese doutoral sobre Blanco Amor fotógrafo- indaga nesta faceta máis descoñecida do escritor do mesmo xeito que Xosé M. Buxán Bran, que foi director da Sala AlterArte do Campus de Ourense Xosé M. Buxán Bran. O escritor e xornalista Luís Rei achégase tamén aos avatares da edición da obra completa de Ramón Cabanillas da que Blanco Amor foi quen finalmente entregou á imprenta en Bos Aires. A editorial mesmo propón un xogo de mesa baseado na novela. Por outra parte, tamén se gravou un disco con dez grupos ourensáns -Animales Domésticos, a Banda Municipal de Ourense, Banda Ourensons, Burgas Beat, Gomes Mouro, Guezzos, Magritte, Perqtores, Sólidos Galicianos e O Sonoro Maxín- con cancións inspiradas ou relacionadas con A Esmorga de Blanco Amor. O vindeiro 18 de decembro celebrarase en Ourense o Festival Eduardo Blanco Amor 5.0, un espectáculo músico-literario que comezará na Praza do Ferro co pasacalles de Cabezudos para chegar ao Auditorio de Ourense coa interpretación ao vivo dos temas musicais compostos para o CD polos grupos. O festival repousará sobre unha fabulación de Fernando Dacosta, Josito Porto e Suso Díaz, que representarán a O Castizo, O Milhomes e O Bocas.

Ademais tamén se editou un DVD cunha obra inspirada nas Farsas para títeres do autor ourensán. A Compañía Viravolta dá vida a O horroroso crime do sacristán, unha peza cunha posta en escena con marionetas de madeira e escenografía en madeira, teas e cartón á maneira dos espectáculos de títeres tradicionais representada nun teatriño.

Ademais, durante todo este mes, celebrarase no Museo Municipal de Ourense obradoiros para a construción de cabezudos inspirados nas personaxes de A Esmorga. O obradoiro corre por conta da Compañía Viravolta coa participación do pintor Manolo Figueiras -autor dos azulexos conmemorativos de A Esmorga- e de Tegra Váquez Carpentier na confección do vestiario dos cabezudos.

Para acompañar a comparsa de cabezudos d"A Esmorga, o grupo Gomes Mouro fixo unha composición musical co título de Mazurca dos Cabezudos da Esmorga.

Finalmente, o vindeiro 1 de decembro, celebrarase unha ofrenda floral a Blanco Amor no cemiterio de Ourense na que participará a cantante María do Ceo. O mesmo día, os alumnos do IES Blanco Amor realizarán outra ofrenda na estatua adicada ao ourensán e tamén representarán a súa obra Os baralláns nos Xardíns do Bispo Cesareo.