Os editores continúan mañá o debate sobre o libro dixital

A Asociación Galega de Editores (AGE) e o Centro Español de Derechos Reprográficos (CEDRO) organizan, coa colaboración do Consello da Cultura Galega, e a Consellería de Cultura e Turismo, o Seminario sobre O libro dixital: presente e futuro, que terá lugar os días 16 e 17 novembro nas instalacións do Consello da Cultura Galega, en Compostela, en horario de 10 a 14 horas. Arredor de medio cento de profesionais do sector editorial e libreiros galegos asisten a este debate sobre o formato do libro electrónico.

O fundador do portal cultural Dosdoce.com, Javier Celaya será o encargado dos relatorios que comezarán por explicar a situación actual do ebook e a situación da comercialización dos libros electrónicos nos principais mercados internacionais. Tamén se referirá á edición dixital, e á transformación do modelo de negocio; facendo unha análise comparativa dos proxectos de dixitalización: mercadotecnia, vendas, distribución, etc. Outros dos puntos que tratará serán os formatos de edición, os lectores para contidos dixitais ou a cadea de valor do e-book.

Na xornada do día 17, o profesor Celaya centrarase nas cuestións da comercialización, a distribución a seguridade e a promoción en liña do libro dixital.

Javier Celaya é socio-fundador do portal cultural Dosdoce.com, membro do Comité Científico do Pacto Andaluz polo Libro (PAPEL) e vicepresidente da Asociación de Revistas Digitales de España (ARDE). En marzo de 2004 fundou Dosdoce.com, un portal especializado en analizar o impacto das novas tecnoloxías no sector cultural.