A Deputación abrirá en decembro uha mostra sobre Blanco Amor

O Centro Cultural da Deputación de Ourense inaugurará o próximo 1 de decembro a exposición Eduardo Blanco Amor. Da súa propia man, en homenaxe ó escritor ourensán.

A mostra, organizadada en colaboración coa Secretaría Xeral de Política Lingüística da Xunta de Galicia, integrarase no programa de actividades que se desenvolverá coincidindo co trinta aniversario da morte de Blanco Amor.

A inauguración terá lugar esa xornada ás 20.15 horas no Centro Cultural da Deputación e antes, pola mañá, desenvolverase a tradicional ofrenda floral no cemiterio de San Francisco.

A exposición está integrada por manuscritos -entre eles, o da propia novela A Esmorga, unha das máis importantes escritas na época- dedicatorias do escritor a diferentes amigos, obxectos persoais, primeiras edicións das súas obras, imaxes, recordos e varias obras de artistas ourensáns creadas especificamente para esta mostra e inspiradas no escritor ou na súa obra.

Entre outros, colaboran na exposición Afonso Vázquez-Monxardín, Arturo Baltar, Arturo Lezcano, Augusto Valencia, Carlos Vello, César Prada, Jacobo e Arce Temes, José Luis Díaz, José Luis López Gonzalez "Tatis", Julio Losada ou Pástor Fábrega, así como a Biblioteca da Deputación e a Fundación Vicente Risco. A mostra poderá verse entre os días 1 e 13 de decembro, no Centro Cultural da Deputación de Ourense.