Xoán Babarro gaña o Premio "Arume"

O xurado da quinta edición do Premio Arume de Poesía, convocado pola Fudnación Neira Vilas, acordou por unanimidade concederlle o galardón á obra presentada baixo o título A Princesa de Taramundi que unha vez aberta a plica, resultou ser da autoría de Xoán Babarro González.

O xurado quixo destacar que se trata dunha "poesía fresca e orixinal, moi relacionada coa natureza e co medio xeográfico. É unha poesía do galego estremeiro, e dende o punto de vista léxico utiliza dialectalismos do galego oriental. A métrica e as estrofas son moi variadas, e xoga coas onomatopeas e cos recursos gráficos para facer os poemas máis atractivos par nenos e nenas.

O xurado, dado o alto nivel contido nos poemarios presentados, acordou tamén conceder dúas mencións de honra que serán entregadas a título extraordinario, pola calidade dos poemarios presentados a Dona Rosalía Morlán Vieitez, pola obra A Coitada Lúa, e a Dona María Canosa Blanco, pola obra A Porta dos Soños. O premio, está dotado con 1.000 euros e a publicación da obra premiada. Entregarase o domingo día 13 de decembro de 2009 nun acto público na Sede da Fundación Xosé Neira Vilas, en Gres, nun acto presidido polo propio Xosé Neira Vilas, e ao que asistirán o alcalde de Vila de Cruces, Xesús Otero, e o secretario xeral de Política Lingüística, Anxo Lorenzo, como entidades patrocinadoras deste premio.

Xoán Babarro González (Calvelo de Maceda, Ourense, 1947) é catedrático de Lingua e Literatura galega. A súa traxectoria desenvolveuse, sobre todo, no ámbito da literatura infantil, pero tamén no teatro ou no ensaio, xénero no que publicou o seu estudo sobre os lindeiros do Navia-Eo en Galego de Asturias. Delimitación, caracterización e situación sociolingüística (2003). Publicou unha antoloxía de poesía desa comarca, baxio o título Évos un amaicer mui guapo, editada no 2007 pola Universidade de Vigo.