Os azos da transmisión xeracional

Fermín Bouza FOTO: Axencias

O sociólogo galego Fermín Bouza salienta no seu blog El voto con botas unha recuperación do galego entre os mozos de 18 a 24 anos pertencentes ás clases medias-altas. A partir de datos que tira das enquisas elaboradas polo CIS que analizan a lingua en relación ao estatus socioeconómico, Bouza non só sinala a través de gráficos unha remontada "clara" do galego como lingua inicial (de aprendizaxe) para os mozos de 18 a 24 anos senón que o salto tamén é significativo entre as clases alta e media alta. Segundo os datos tirados polo CIS (Centro de Investigacións Sociolóxicas) antes das eleccións de 2009, o 36 % dos mozos enquisados entre 18 a 24 anos cun nivel socioeconómico medio-alto aseguran ter o galego como lingua inicial.

"Os ricos tamén volven a socializar en galego aos seus fillos nunha proporción interesante e iso indica que o galego volve ser, en parte, unha lingua de oportunidades, é dicir, unha lingua con opcións profesionais e vitais incluídas", apunta Bouza no seu blog.

Unha idea que o catedrático de Socioloxía xa apuntara a semana pasada no seminario Lingua, sociedade e política en Galicia, celebrado no Consello da Cultura en Compostela. Na súa intervención, Bouza xa apuntaba un incremento no número de mozos que foron educados en galego e castelán como linguas iniciais. O sociólogo engadía tamén que "non se pode exercer profesionalmente en Galicia sen saber galego".

Ao seu ver, o idioma propio do país está mantido como unha "lingua de prestixio" pero non de oportunidades, como si se presenta o castelán. Na súa opinión, a Xunta debería emprender "políticas de recolocación do galego como lingua de oportunidades e non excluílo do espazo público, como o fixeron ao retiralo como lingua obrigatoria das oposicións". Para Bouza, ademais "hai que recuperar a vontade de falar, algo que falta nas clases medias altas das cidades" nas que o castelán continúa a ser, malia todo, a principal lingua de uso.