Unha musa para Fiz Vergara Vilariño

A punto de finalizar a instalación do Roteiro literario-artístico pola Lóuzara de Fiz Vergara Vilariño, a Asociación Ergueitos -encargada da organización- colocou tres obras máis. Miguel A. Macía creou unha Musa para Fiz que desde o cimo de Santalla olla para a casa do poeta agardando que lle falen os seus versos. Paco Poy instalou na Aira de Tesín un escano e unha lareira lembrando que a casa é o cerne habitado do que bebe o poeta. Un lugar íntimo no que se instala a palabra para, desde alí, chegar ao infinito. Primitivo Lareu, por último, instalou en Aira Padrón a "muller unicornio", que nos sinala o inicio do camiño, o inicio do Val, o inicio dun roteiro cheo de lugares habitados e de poesía. Estas sutís intervencións na natureza imbrican a ollada do camiñante nun universo poético ben ligado ás terras louzarinas.