O trinta de decembro, o mesmo día no que se celebra a translación dos restos do Apóstolo e á véspera da derruba da Porta Santa para o Xacobeo 2010, a Consellería de Educación dará a coñecer o borrador do novo Decreto do Galego. A data, que coincide tamén co último Consello da Xunta, leva até o límite a promesa do presidente da Xunta, Alberto Núñez Feijóo, de presentar o texto antes de concluír o ano, pero non deixa de ser unha data propicia para a polémica: en plenas vacacións de nadal e na antesala dos festexos do Ano Santo. A oposición parlamentaria do Partido Popular (PP), en previsión dunha posibilidade semellante, forzou de feito onte o debate sobre a política lingüística de Feijóo.

O camiño do novo decreto resultou máis tortuoso do que o presidente supoñía e do que prevía o encargado da súa redacción, o secretario xeral de Política Lingüística, Anxo Lorenzo. A maior dificultade foi contentar as distintas familias que conviven no propio PP, con posturas dispares respecto ó que debe ser o uso do galego no ensino.

O sector de tendencia galeguista xa lle deixou claro a Feijóo que non recibirían ben un desregulamento legal significativo do idioma propio. Esta mesma fin de semana, o candidato a presidir o partido en Ourense, José Luís Baltar -fillo do actual presidente da Deputación ourensá e contrincante da lista apoiada polo aparato oficial-, cualificou a lingua galega como "un elemento diferenciador fundamental" que cómpre protexer e confiou en que o novo decreto "non relegue o galego en beneficio do castelán" porque, nese caso, "non tería futuro".

Outros sectores son moito máis refractarios, en concumitancia con asociacións como Galicia Bilingüe, á que o PP -e o propio Feijóo- apoiaron nalgúns dos seus actos de defensa do castelán na etapa do goberno Bipartito. Dous son os polos que presionan o presidente para esborrallar as liñas básicas do proceso de normalización. Por un lado, o presidente do PP coruñés e xefe da oposición municipal herculina, Carlos Negreira, aprema a abrir canles que permitan modificar a lexislación actual, entre outras razóns para poder institucionalizar o topónimo en castelán da cidade.

Polo outro lado, a presidenta da Autoridade Portuaria de Vigo -e probable candidata do PP á Alcaldía de Vigo- xa amosou durante a pasada campaña electoral autonómica que abandonaría o partido se ao chegar a Xunta, Feijóo non modificaba o actual decreto e rebaixaba a presenza escolar da lingua galega.

Porro, unha das personalidades conservadoras máis próxima publicamente a Galicia Bilingüe, coincide nas súas teses co outro home forte do PP vigués, Ignacio López Chaves, concelleiro e protavoz do PP no Parlamento para asuntos culturais. López-Chaves presentou recentemente unha moción para evitar que o galego fose a lingua do uso do Concello de Vigo.

Os problemas do ensino en inglés

Con estes resortes presionando, ninguén se atreve a adiantar cal vai ser a división lingüística que ofreza o novo decreto, engadindo ademais a vontade de que se dea entrada ao inglés como lingua do ensino, de xeito que o bilingüismo se transforme en trilingüismo.

Algunhas asociacións e sindicatos consideran que a entrada do inglés no sistema educativo é unha especie de envoltorio para lapelar o galego, como aconteceu na Comunidade Valenciana coa materia de de Educación para a Cidadanía, oficializada en inglés polo goberno do PP como revancha polo seu desacordo coa disciplina. En calquera caso, o ensino trilingüe presenta series dificultades no caso do inglés, tanto polas dotacións escolares como polo escaso dominio desta lingua entre os profesores, como criticaron diferentes asociacións.