“Contra os novos séculos escuros”

A capela da Madalena de Arzúa acolleu onte pola mañá a en­trega dos premios do Certame de Narración Breve Modesto Rodríguez Figueiredo. Esta cita coa literatura contemporánea en galego pretende converterse nun trampolín para os escritores que utilizan a lingua propia ao tempo que se loita "contra estes novos séculos escuros", segundo as verbas da mantedora do acto de onte, Iria Torreiro Rodríguez.

As alusións aos grandes da literatura galega, coma Rosalía de castro, Castelao, ou Eduardo Pondal, entre outros, non falta­ron no que se perfilou como un canto pola "identidade e a cultura" de Galicia. O presidente da Fun­dación Pedrón de Ouro, Xosé Ramón Fandiño Neira, pola súa banda, lembrou a relación entre a vila arzuán e persoeiros ilus­tres da literatura galega que, co­mo Ánxel Casal ou Luís Seoane, "foron os elementos urbáns" dos seus ancestros rurais. Fandiño tamén fixo mención aos gañadores doutras edicións do Modesto Rodríguez Figueire­do, ao tempo que salientou as di­ficultades á hora de elaborar un­ha narración breve. "Esixe unha precisión de reloxería; cada fra­se é un elemento indispensable para o conto", indicou.

Proba desta precisión foron os relatos presentados polos tres gañadores deste certame: Juan Tallón, con Era el, que acadou o primeiro premio "pola súa flui­dez narrativa"; Manuel Quintáns (primeiro accesit) con A movida, e Fernando Lavandeira (segundo accesit) con Gaspar, Gaspar.

Antes da intervención do ven­cedor deste certame, desenvol­veuse unha actuación do dúo de corda do conservatorio de Arzúa composto por Eva Negro e Mar­cus Balado. Tras as dúas pezas musicais, Juan Tallón amosou o seu agradecemento por ser elexi­do gañador do Modesto R. Figuei­redo.

O seu discurso destacou por ser un canto ao "fracaso", xa que, para este escritor, "perder é algo diario", ao tempo que indicou que cada persoa "fracasa a todas ho­ras. É o propio, o familiar, é o no­so", engadiu o gañador.

Coma solución a estes atran­cos diarios, Tallón lembrou que "o importante é escribir". Finalmente, o alcalde de Arzúa, Xaquín García Couso, pe­chou a quenda de intervencións cun especial agradecemento aos promotores deste acto, o con­celleiro de Cultura, Xosé Luís García, e o bibliotecario munici­pal, Moncho Torreiro.

O gaiteiro Manuel Varela foi o encargado de pechar este solemne acto desenvolvido na capela da Madalena. Ento­nou as notas do himno galego que foi cantado por todos os asistentes a esta cita.