Xoves 02.09.2010
| Actualizado 18.54
Hemeroteca web
|
RSS
RSS
|
O Auditorio da Xuventude de Cambados clausura hoxe, ás 20:00 horas, o Ano Cabanillas coa presentación da escolma Roteiros pola poesía de Ramón Cabanillas, elaborada polo académico Francisco Fernández Rei e polo biógrafo do poeta, Luís Rei, asesores da Comisión do Concello de Cambados que este 2009 organizou actos sobre a obra do autor de Vento mareiro.
A escolma é unha obra non venal, da que se tiraron 5.000 exemplares, dos que 4.500 xa se están a repartir estes días entre as máis de 4.000 casas do concello de Cambados. A obra divídese en tres partes: unha relativa ás paisaxes da vila do poeta, outra que percorre o val do Salnés e unha terceira sobre a poesía do homenaxeado.
O primeiro roteiro titulado O Cambados pobre, fidalgo e soñador máis ben é un "rueiro" que permite vagar polas tres antigas vilas que conforman o actual Cambados co fin de gozar da xente, das paisaxes e dos monumentos evocados por Cabanillas en diferentes momentos da súa vida. O seguinte roteiro, titulado O rumoroso val do Salnés, busca a globalidade, a presenza conxunta da comarca (e do mar que a apreixa) máis que as distintas paisaxes e os lugares que a compoñen. E o derradeiro roteiro, titulado Roseiras, fouces e marusías, tenta seguir o "camiño longo" persoal e á vez quere ser un percorrido polo proceso creativo do vate de Fefiñáns.
Con música de zanfona e versos
Ramón Cabanillas foi construíndo unha lingua galega supradialectal e elegante á que lle deu "estado de eternidade", coma ninguén antes ca el lle dera; unha lingua onde está moi presente a morfoloxía e un bo quiñón léxico que recolleu da xente labrega e mariñeira do rumoroso val do Salnés e do seu tan amado Cambados natal. O acto ambientarase con música de zanfona; e antes das palabras de clausura do alcalde de Cambados, escenificarase a obra O bendito san Amaro e algúns poemas natalicios do poeta cambadés, a cargo do Cadro de declamación do Instituto Ramón Cabanillas, de Cambados.
