Ergom publican o seu primeiro disco

O grupo ourensán Ergom está a presentar o seu primeiro traballo musical, oito anos despois da constitución da banda. Tras moitas horas de traballo e xornadas de intensos concertos, sae á luz, dende o barrio ourensán de Velle, este material que condensa baixo o nome de Fronkiria.

O disco deriva da mestura musical do estilo Fronky (Folk-Rock-Funky) e da fantasía que envolve os integrantes do grupo. Realidade e ficción combinada nun material musical que contaxia e hipnotiza, na que non existe a indiferenza.

O seu son orbita arredor de melodías transparentes, intensas baladas, flirteos co funk, clásicos tempos de rock e rítmicos reels, sen descoidar a raíz tradicional dalgún dos seus instrumentos mais sen deixar de lado a evolución e fusión que caracteriza a súa forma de ver a música. Acompañando ao potente traballo musical, Fronkiria existe no mundo virtual grazas a estrafalarias personaxes que aparecen no disco procedentes de galaxias tecnoloxicamente enxebres: naves espaciais a pedais, planetas construídos con estadas, teclados sobre nenúfares, baquetas eletrotérmicas ou poderosas gaitas láser son exemplo do universo dual que representa Fronkiria: Realidade-Fantasía, Tecnoloxía-Artesanía rudimentaria...

Ergom gravou unha primeira demo autoeditada en 2003 nos Estudios Muu! en Vigo, coa produción de Pedro Feijoo e Charly Lincoln. Nesta gravación reflectiron os fundamentos do seu son máis clásico así como os novos camiños polos que discorre a súa evolución e fusión cos demais estilos musicais.