Domingo 07.02.2010
Hemeroteca web
|
RSS
Maré | RSS
|
O Pazo de Congresos e Exposicións de Pontevedra acolle dende hoxe e até o vindeiro 14 de marzo a XI edición do Salón do Libro Infantil e Xuvenil, que este ano ten os espazos urbanos como protagonistas. A inauguración que se celebrará hoxe no Auditorio do Pazo da Cultura tratará precisamente sobre as Cidades Imaxinarias.
A programación do Salón do Libro Infantil e Xuvenil diríxese a toda a familia e ten como obxectivo que "poidan divertirse e descubrir xuntos o mundo dos libros, como se estivesen no salón da súa propia casa", explican os organizadores. As actividades previstas para todos os públicos inclúen espectáculos, música, conferencias e outros actos, ademais de exposicións, varios obradoiros de animación á lectura e outros relacionados coa literatura e o teatro infantís e xuvenís, que se combinarán con eventos en colaboración cos centros escolares.
O Salón do Libro recoñece este ano a súa traxectoria literaria a Agustín Fernández Paz cunha homenaxe no Pazo da Cultura o vindeiro sábado 13 de marzo de 2010, ás 13.00 horas.
As instalacións do Pazo da Cultura de Pontevedra permanecerán abertas ata o domingo, 14 de marzo e contan cun espazo ambientado polo alumnado da Facultade de Belas Artes, exposicións de traballos escolares e ambientación xeral do Pazo da Cultura pola escola de tempo libre Paspallás. Tamén haberá exposicións sobre a homenaxe a Agustín Fernández Paz e O libro das viaxes imaxinarias, de Xabier P. Docampo.
A Concellaría de Cultura e o Pazo da Cultura de Pontevedra organizan o Salón, en colaboración coa Consellería de Cultura e Ensino, a Fundación Caixagalicia, a Asociación Sociopedagóxica Galega, a Asociación Galega de Editores, a Banda de Música de Pontevedra, a Biblioteca Pública de Pontevedra Antonio Odriozola, a Biblioteca Virtual Galega, a Biblioteca de Literatura Infantil e Xuvenil Galega (BLIX), o Centro Cultural de Monteporreiro, o Ciclo Superior de Educación Infantil do IES Xunqueira I, o Cine Clube de Pontevedra, Domingos do Principal, ETL Paspallás, Facultade de Belas Artes, Facultade de Ciencias da Eduación, Facultade de Ciencias Sociais e da Comunicación, Fundación Caixanova, GÁLIX, IES Carlos Oroza, Museo de Pontevedra, ONCE, Policía Municipal de Pontevedra, Vicerreitoría do Campus de Pontevedra da Universidade de Vigo e a Casa das Campás, entre outros.
As marionetas de Gorakada
O Teatro Principal de Pontevedra acolle hoxe ás 12:00 e ás 18:30 horas a representación do espectáculo "multicultural" La Ciudad Inventada, a cargo da compañía vasca Gorakada.
Na obra conviven varios contos tradicionais procedentes de distintos lugares do planeta, dando lugar a varios encontros orixinais que enriquecerán os seus protagonistas. O obxectivo das marionetas que percorrerán o escenario é quitarlles aos nenos e nenas o medo que teñen a separarse dos seus pais e nais.
A historia comeza cando un neno senegalés coñece unha nena brasileira que non pode durmir desde que o seu pai a abandonou. Os dous protagonistas, que vivían as súas aventuras en contos distintos, comparten as súas dúbidas e os seus medos, ao descubrir que teñen máis en común do que pensaran.
Maui, o personaxe dun conto tradicional neozelandés consegue derrotar a un malvado feiticeiro palestino. Ao tempo, un coello arxentino pide axuda aos seus veciños para recuperar a súa casa, que fora ocupada por un descoñecido.
A duración do espectáculo é de 55 minutos e está recomendado para públicos infantís, a partir dos cinco anos. Ademais, o vindeiro luns haberá unha nova función da obra, que ten o aforo concertado cos colexios na sesión das 11.30 horas.
Lembranza de Anisia Miranda
O martes 9 de febreiro ás 19:00 horas o Salón do Libro de Pontevedra homenaxeará a escritora recentemente falecida Anisia Miranda cunha lectura colectiva das súas palabras, na cal todas as persoas interesadas na súa obra están convidadas a participar. O evento celebrarase na Casa das campás e o tempo de intervención será de entre 3 e 5 minutos por lector. Ademais, tamén se poderá asistir a espectáculos dirixidos aos máis cativos como Rosalía, a pulga que escribía de Galitoon, Os Bolechas de Caramuxo Teatro ou Pacama de Katarsis. Ademais, ofrecerán conferencias os escritores Xurxo Souto, Inma López Silva ou Marcos Sánchez Calveiro.
Exposicións e obradoiros
O Salón tamén inclúe exposicións e obradoiros. Así, haberá mostras como a bibliográfica A cidade e os libros ou Donde nunca pasa nada de Fruela Alonso, que se inaugurará o vindeiro luns, ás 20:30 horas na Galería Sargadelos de Pontevedra.
Por outra parte, celebraranse talleres gratuítos como o titulado Sonotopías, escoita e territorio do colectivo Escoitar.org, que se desenvolverá do 1 ao 5 de marzo, o Obradoiro de construción de títeres con material de refugallo de Títeres Cachirulo, que será do 1 ao 4 de marzo, ou o taller de animación á lectura de Kamante Teatro, tamén do 1 ao 5 de marzo.
