Compostela, en pé de pedra

Organizadores e bailaríns onte na presentación do Festival ‘En Pé de Pedra’ FOTO: GH

O festival de danza En Pé de Pedra trasladará a danza ás rúas de Santiago desde hoxe e ata o domingo na que será a súa undécima edición. Durante estes días, poderase asistir a 26 espectáculos repartidos por toda a cidade, das que 7 son estreas e 2 preséntanse en España por primeira vez.

Nesta edición participarán 44 bailaríns procedentes de Canarias, Galicia, Madrid, Alemaña, Colombia, Brasil, Xapón e Portugal, que contarán con 3 espazos novos: a sala Chocolataría, a carballeira de San Lourenzo e o parque da Constitución. Ó festival acudirán máis de 20 programadores culturais e medios especializados.

O obxectivo deste evento é "sacar a danza do seu espazo habitual", usando a cidade como marco escenográfico, ou descontextualizándoa en espazos interiores, desprovistos de escenografía, como indicou a programadora do acto, Ana Vallés, durante a súa presentación onte no teatro Galán de Santiago.

O concelleiro de Cultura de Santiago, Néstor Rego, recoñeceu o labor do festival de "achegar a cultura á xente" e a súa contribución a que Santiago "se asente como referente cultural en todo ou mundo". O festival, concibido especificamente para a capital galega e organizado polo teatro Galán, recibiu xa o Premio Galicia 2006 de Artes e Ciencias da Representación e o premio Zapatilla de Artez.

Por parte do Centro Galego de Arte Contemporánea (CGAC), Cristina Trigo lembrou que En Pé de Pedra se mantén grazas á implicación e esforzo de moitas persoas e compañías de danza. O representante do Instituto Galego de Artes Escénicas e Musicais (IGAEM) anunciou durante a presentación do festival que haberá "momentos doces para a danza" proximamente, xa que tras o verán se executarán varias políticas de apoio á produción e distribución da danza.

Unha das propostas máis sorprendentes de En Pé de Pedra é a do bailarín canario Daniel Abreu e o grupo musical galego Parto, que combinarán nun espectáculo de improvisación a coreografía e a música cun aquófono. Esta estrea, encargado para o festival, representarase na Chocolataría, onde tamén se poderá realizar unha visita interactiva ó aquófono. A nivel internacional, o bailarín xaponés Hiroaki Umeda presentará en España un espectáculo de imaxe, son e danza, que se basea no xogo co espazo, que nesta ocasión será a Facultade de Ciencias da Comunicación de Santiago. O outro espectáculo que se representa por primeira vez no Estado é o do alemán Urs Dietrich, con dúas pezas nas que estoupa o simbolismo e a metáfora.