Tras actuar no FIB, o grupo Nadadora tocará o martes en Sevilla

Pola esquerda, Sara, Iñaki, Edu, Montxo, Dani e Gonzalo forman o sexteto Nadadora FOTO: GH

O seu nome xorde dunha canción do grupo Family, pero para Sara (voz), Iñaki (guitarra), Dani (batería), Montxo (teclados), Edu (baixo) e Gonzalo, Nadadora é moito máis que iso. "A posibilidade de facer o noso soño realidade", di Gonzalo Abalo, unha das voces e guitarras do grupo que acaba de chegar do Festival Internacional de Benicàssim (FIB) e que nos dedicou unhas palabras.

Este sexteto galego, nacido no 2002, comparte moitos dos seus momentos no Grove, o punto de encontro no que xorden as súas melodías de pop tranquilo, pois eles son de lugares diferentes (Caldas de Reis, A Coruña, Vigo no Grove). "Facemos todo no Grove, eu compoño as cancións na miña casa, quedamos e ímolas ensaiando e arranxando día tras día, ata que están listas. Tamén nos xuntamos para pasalo ben, saír e ir a tomar algo, como grupo que somos." Despois do seu paso inesquecible polo FIB e de enchouparse de boas experiencias, están máis dispostos que nunca a seguir traballando duro para facer mellores cancións e algún día volver a Benicàssim, pero "a próxima vez queremos que sexa no escenario verde", afirma ilusionado o guitarrista. A chamada que os levou a Alacante foi decisiva para a súa carreira, pois alí tiveron a oportunidade de experimentar a sensación de ver unha carpa chea de xente que ás 17:30 horas, retaba os máis de 40 graos de temperatura para velos. Ademais, Gonzalo explica que "en todo momento nos trataron coma o resto dos grupos internacionais, comiamos no mesmo restaurante e compartimos fotos, charlas e cervexas con Franz Ferdinand, The Strokes con Pet Doherty dos Babyshambles e cos nosos admirados Mojave 3".

Malia isto, os membros de Nadadora aínda non son moi conscientes de todo o que viviron dende que, no 2005, saíu á venda o seu primeiro disco Todo el frío del mundo. "Non temos moitas destas cousas asimiladas, alucinamos con todo o que nos está pasando, pero cos ollos ben abertos para que non se nos escape nada". Mais, entre a maxia do FIB, houbo unha parte negativa, ao sexteto galego roubáronlle gran parte do equipo musical e tiveron que suspender o concerto que tiñan en Canet de Berenguer (Valencia). "Iso tamén nos axuda a enfocar o grupo como algo máis serio e a darnos conta de onde estamos", explica Gonzalo. Agora Nadadora estase preparando para o concerto do próximo martes no ciclo Nocturama de Sevilla e, en breve empezará a preparar o seu segundo traballo, que teñen previsto sacar nos primeiros meses do 2007.