O día grande da blogosfera

Hai xa dous anos que o israelí Nir Ofir lanzou a iniciativa de unir todos os blogueiros dispersados polo globo co propósito de dar a coñecer novos autores, puntos de vista e enlaces novidosos para a comunidade. A súa proposta consistiu en que todo titular dunha bitácora publique no 31 de agosto, un artigo recomendando 5 novos blogs, preferentemente diferentes á súa propia cultura, punto de vista e posición. A xornada de mañá, convértese nun día para o coñecemento de novos blogueiros e experiencias afastadas do propio contorno máis habitual. A idea do pai da bitácora en Israel triunfou, mañá a globosfera ampliará os seus coñecementos e dentro dela a galega, con ampla experiencia na creación destes espazos dixitais.

Un blog é basicamente unha páxina web con entradas que se organizan cronoloxicamente. Estas bitácoras en formato dixital xurdiron como un espazo para a liberdade de expresión e opinión dun público unido por conceptos e preferencias comúns. Pouco a pouco, a xente foi conxeniando con eles e os espazos evolucionaron incluíndo novas ferramentas como as fotografías. A rápida acollida do fenómeno blog fixo que os espazos na rede se multiplicasen a tal velocidade que hoxe en día resulta moi difícil calcular unha cifra exacta . O buscador especializado Technorati, directorio de referencia na blogosfera, comunicou que o número de bitácoras medrou no 2006 superando en 8 millóns máis que no 2005 e 23 máis que en 2004. Esta cantidade vénse multiplicando por dúas cada seis meses e estímase que cada día ven a luz 75.000 novas bitácorase desde onde se lanzan máis dun millón de artigos.

Blogaliza, o punto de unión para un abano de ofertas

Pouco máis de dez minutos pode ser o tempo estimado para que calquera persoa cree o seu propio blog, contando só cun dominio da rede a nivel usuario. A pesar de que moitas bitácoras se abandonan segundo Technorati, máis de 13,7 millons matéñense en funcionamento e son actualizadas regularmente.

Do mesmo xeito que acontece noutros soportes, na rede cada quen é libre de elixir a información que consome e os gustos de cada visitante son do máis variado. Na comunidade galega, blogaliza constitúese como unha iniciativa á que están ligadas a maioría das bitácoras do país ou polo menos as de máis éxito e que cobren un amplo abano de temas. Hai blogs cun marcado carácter cultural, outros nas que se comenta o día a día, os que se orientan a un determinado campo profesional... O certo é que non se pode ligar cada un deles estritamente a un tema porque son os propios blogueiros os que cos seus argumentos van conformando o que se podería definir como un salón dixital para a conversa.

Espazos para a normalización da lingua e escrita en galego

Nunha comunidade como a galega, onde só o 30% da poboación accede á rede de xeito habitual fronte á media europea do 60%, o desenvolvemento do fenómeno blog é moi importante.

O nacemento constante das bitácoras no seo da comunidade leva a pensar que o blogmillo, como se coñecen os seus usuarios en Galicia, segue medrando. De feito, xa son moitos os que opinan que, desde o punto de vista do uso idioma e da escrita, son uns dos espazos máis normalizados e con máis forza. Nun simposio realizado no 2005 por especialistas na blogosfera, o cálculo apuntaba a que cada ano se rexistran aproximadamente uns 50.000 comentarios en galego incorporados á rede aproveitando as bitácoras. A cifra permite deducir segundo os expertos que en Galicia o 90% de ditos espazos empregan o galego. Quizais neste apoxeo teña moito que ver o propio dinamismo e inmediatez que ofrecen estes anacos de rede, nos que cada lector pode contestar cun comentario, tamén coñecido como post, para que á súa vez sexa analizado por outros usuarios. Aínda que moitos non experimentaron o mundo blog, o alcance destes fragmentos de rede é xa indubidable.