Cortázar forza o reencontro

Ánxela Bugallo (dereita) xunto a Emilio Pérez Touriño, Aurora Bernárdez e a muller do presidente, Esther Cid durante a ianuguración da mostra de Cortázar FOTO: GH

Ler imaxes: o arquivo fotográfico de Cortázar é o título da mostra que onte abriu o Outono Cortázar e que amosa, en dous espazos de Compostela, o Pazo de Compostela e a Igrexa da Universidade, boa parte do legado de Julio Cortázar que a súa viúva, Aurora Bermúdez, doou a Galicia. O legado, segundo o presidente da Xunta, Emilio Pérez Touriño, "une para sempre" a Cortázar con Galicia e as súas palabras foron, en verdade, unha premonición do marcado símbolo político que supuxo a inauguración: a titular de Cultura, Ánxela Bugallo, ocupou un lugar principal do acto, algo pouco frecuente despois dos continuos desencontros entre o presidente socialista e a conselleira nacionalista.

E é que a ianuguración se converteu no acto cultural máis solemne que desenvolveu o Goberno galego desde a chegada á Xunta: desde o conselleiro da Presidencia, Méndez Romeu, ao alcalde compostelán, Xosé Sánchez Bugallo, pasando polo delegado do Goberno central en Galicia, Manuel Ameijeiras; o rector da Universidade de Santiago, Senén Barro; o director xeral de Comunicación, Fernando Salgado, e unha longa lista de altos cargos e responsables de entes autonómicos, como a radio e a televisión. E, incluso, estiveron, políticos do BNG, o cal converteu o acto nunha auténtica confluencia do bipartito.

Cortázar, indicou Touriño, converte a Galicia nun "país un pouco máis universal" . Aurora Bernárdez , mestra de cerimonias da reconciliación, asegurou que estaba asombrada da rapidez con que tomou forma o legado do escritor e destacou a súa vinculación con autores galegos.