Xoves 21.05.2009
Hemeroteca web
|
RSS
Comunicación | RSS
|
 |
| Alfonso Sánchez Izquierdo, periodista e profesor en Xornalismo FOTO: G.H. |
O Goberno galego de Alberto Núñez Feijóo aprobará na reunión de hoxe do consello a proposta de nomear como director xeral da Compañía de Radio e Televisión de Galicia (CRTVG) a Alfonso Sánchez Izquierdo, ex director do xornal La Región ata xullo do ano pasado. Esta proposta non contará co consenso dous dous grupos da oposición, PSdeG e BNG.
A piques de arrancar a campaña electoral para as eleccións europeas do 7 de xuño, a designación deste cargo levou onte a polémica ao pleno da Cámara, onde os populares aseguraron que o nome fora consensuado cos socialistas, pero estes negárono e acusaron ao PP de "impedir o consenso" no nomeamento do director da CRTVG. Pola súa banda, o BNG recoñece que non o consultaron ata onte.
O secretario xeral do PSdeG e voceiro do Grupo Parlamentario Socialista, Manuel Vázquez, aproveitou a pregunta ao presidente para asegurar que a Xunta tiña previsto aprobar hoxe unha proposta "unilateral" e acusouno de "incumprir" así o compromiso electoral de "acordar" o nomeamento do director xeral da CRTVG no Parlamento. Fronte a iso, Núñez Feijóo denunciou a "falsidade" da afirmación de Vázquez e asegurou que este nomeamento se pactou co PSOE, que supostamente lle deu "o seu visto e prace" ao candidato. Nas conversacións, nas que non participou o BNG, segundo os populares baralláronse tamén os nomes de Anxo Quintanilla, Arturo Maneiro e Bieito Rubido por proposta do PP.
Segundo explicou Feijóo, tanto el como Vázquez reuníronse co candidato e "houbo conformidade". Tras o debate aberto no hemiciclo, o vicevoceiro do Grupo Parlamentario do PPdeG, Pedro Puy Fraga, compareceu ante os medios e ratificou as palabras de Feijóo, reiterando que eses encontros "existiron" e que o PSOE "sinalou" a Sánchez Izquierdo como un candidato "aceptable". O voceiro do Grupo Parlamentario Socialista, Xaquín Fernández Leiceaga, recoñeceu a existencia de "conversacións exploratorias" entre PSdeG e PP encamiñadas a buscar un nome de "consenso" para a CRTVG e admitiu tamén que a intención era incorporar "posteriormente" ó BNG.
Longa traxectoria profesional
Nacido en Marrocos en 1949, Sánchez Izquierdo desenvolveu case toda a súa vida profesional na "La Región", onde traballou durante 35 anos e chegou a ocupar o cargo de director. Licenciado en Dereito e en Ciencias da Información pola Universidade Complutense tamén traballou na axencia Efe. Agora imparte docencia na Facultade de Ciencias da Comunicación de Santiago.
Puy Fraga: "Houbo lealdade"
O popular Puy Fraga recoñeceu que a intención do Goberno galego era, efectivamente, dar luz verde á proposta supostamente "pactada" co PSOE hoxe, pero insistiu en que existía un "acordo" previo cos socialistas e resaltou a "lealdade" coa que se levaron as negociacións.
"A lealdade foi tanta que Vázquez anunciou que a proposta iría ao consello porque o dixémos nós", explicou Puy Fraga, quen avanzou tamén que o voceiro parlamentario do PPdeG, Manuel Ruiz Rivas, comunicou onte a proposta ao BNG para que "entrase" nas negociacións.
Aymerich: "Un "paripé"
Na súa comparecencia ante os medios, o nacionalista Aymerich confirmou que Ruiz Rivas se dirixiu ao termo da sesión plenaria para comunicarlle nunha conversación "informal" que a Xunta ía aprobar a proposta de nomeamento de Sánchez Izquierdo no consello de hoxe e que o PSdeG "estaba de acordo".
"Despois o PSOE díxome outra cousa, pero alá eles", matizou o nacionalista e criticou duramente a "exclusión" do BNG nas conversacións para designar o novo director xeral da CRTVG. "Valente consenso", amoestou e acusou a Núñez Feijóo de impulsar "un paripé" na Cámara.
