Sete de cada dez editores ingleses barallan cobrar por ver en internet

Os editores británicos empezan a cambiar de opinión. Hai apenas dous anos, menos da metade cría que houbese marxe para cobrar polo seu contido en internet. Hoxe, sete de cada 10 barallan a idea e algúns se dispoñen a levala a cabo antes de que acabe o ano. É a proba dun cambio de vento no sector que iniciaron as cabeceiras de Rupert Murdoch pero que parece abocado a estenderse. O dato pertence a unha enquisa da Asociación de Editores Online, publicada onte e que representa 28 empresas de comunicación británicas. Entre elas, as editoras do Financial Times, o Mirror, o Daily Telegraph e News International, responsable dos diarios The Times e The Sunday Times e The Sun. Segundo a enquisa, as empresas de comunicación teñen moi claro cales son os seus inimigos na área que se abre: o Goberno, Google e a BBC. Os editores británicos intúen que non será fácil cobrar por ler as noticias porque os lectores as terían gratis cun par de clics máis en calquera dos agregadores.