A TVG elimina tres dos seus espazos culturais

Programa de ‘Libro Aberto’, co seu presentador Manolo Romón, á esquerda, cuns invitados FOTO: TVG

A dirección da TVG decidiu prescindir de tres dos seus programas culturais, Miraxes, Libro Aberto e Onda Curta ademais de reestruturar outros como Planeta Cine. En total son catro persoas as que perden o seu posto de traballo. A última emisión de Miraxes será o día 20 de decembro. Os tres redactores fixos do espazo, Xandra Tedín, Montse Montaos e Miguel Fernández xa recibiron a carta de despedimento. Miraxes, que presentaba as novidades dos eidos artísticos e culturais do país, contaba con sección de reportaxes, axenda de actualidade, cine e música e nos últimos tempos estaba obtendo un bos resultados de audiencia.

Cambios na programación pola chegada do Nadal

Pola súa banda a derradeira emisión de Libro Aberto, será o día 15 deste mes. Non está previsto gravar novos programas tras o descanso de dúas semanas debido á programación especial de Nadal. Libro Aberto contribuía ao fomento da lectura e apoiaba o traballos dos escritores, estaba consolidado na grella dende o ano 2006. Libro Aberto tamén visitou clubs de lectura, bibliotecas, librerías e outros espazos, sempre cos libros como protagonistas

Onda Curta, que amosaba as creacións dos cineastas galegos e con atención especial aos novos talentos, remata tamén este mes o seu periplo pola Galega. A Carlos G. Meixide, director do programa, foille rescindido onte o seu contrato co ente público. A derradeira oportunidade para ver Onda Curta é o próximo 14 de decembro. Tamén se prevé unha reestruturación de Planeta Cine coa súa posible incorporación a outro programa da cadea. A súa última emisión está prevista para o dazaoito de decembro para pasar logo a un descanso navideño.

A Televisión de Galicia non quixo onte pronunciarse sobre os cambios na súa grella. Si confirman que haberá modificacións na programación debido a temporada de Nadal como ven sendo habitual nos últimos anos e na maioría das canles.