Xoves 02.09.2010
| Actualizado 18.54
Hemeroteca web
|
RSS
RSS
|
 |
| Os compoñentes de Berrogüeto momentos antes da presentación á prensa do seu último disco FOTO: Mon |
Vén atrás dun demorado silencio, o que lle seguiu á publicación de Hepta, en 2001. Por iso 10.0 -un título que recende a futuro e a tecnoloxía-, é algo máis có novo e agardado disco de Berrogüetto ou a celebración de dez anos de experiencias musicais. En 10.0 hai unha sorte de estado de graza colectivo que permitiu a factura deste traballo que Anxo Pintos, voceiro da banda, definía onte como un "disco íntimo, sen artificios, case sen colaboracións"; máis eles ca nunca e debedores dun esencialismo que se filtra nos sons e nas letras deste regreso.
A materia prima fundamental da gravación -recoñecíano onte os integrantes do grupo-, é "a música tradicional". Malia iso non hai temas tradicionais neste CD e si once cancións propias, composicións de Guadi Galego,Guillermo Fernández, Anxo Pintos, Quim Farinha e Quico Comesaña.
Froito dun "consenso absoluto" entre os membros de Berrogüetto, 10.0 é tamén o seu disco máis coral. "Somos compañeiros e tamén amigos, e iso facilita as cousas", sinalaba onte Anxo Pintos, quen defendeu a autoedición deste volume como unha mostra de madurez. "Berrogüetto pode afrontar unha relación directa co mercado, sen intermediarios, facendo un seguimento exacto de todo o que acontece ao redor do grupo".
A crise do mercado discográfico conduce tamén a fórmulas innovadoras que se concretan, desta volta, no nacemento dun produto integral, que non se reduce só á música e que estende a súa influencia a todas as disciplinas e manifestacións artísticas que o arroupan. O deseñador galego Fernando Lema é o autor da imaxe do disco (unha aposta tamén pola pureza expresiva) e Karlos Abal asina as fotografías. Imaxes e formas que amparan a cerna deste 10.0, un disco de "música fresca, luminosa, vivaz, cálida; un disco moi acústico...", pródigo en viaxes evocadoras: Bretaña, Cracovia e o interior mesmo de Berrogüetto.
Seis temas instrumentais e cinco temas con voz fican neste disco. As letras chegan da man de Guadi Galego e os arranxos asínaos o propio grupo, así como a produción artística. O disco foi gravado nos meses de marzo e abril de 2006, e mesturado nos estudios Edisco da Estrada por Suso Ramallo.
Un proxecto musical en vídeo
Durante o vindeiro mes de xuño, Televisión de Galicia emitirá un spot realizado pola Productora Faro, onde Carme Nogueira, Virxinia Rodríguez, Antoni Ros Marbá e Arsenio Iglesias lle poñen palabras ao concepto Berrogüetto. O vídeo foi presentado onte na rolda de prensa celebrada no Club Internacional de Prensa
Doutra banda, o director xeral de Creación e Difusión Cultura da Xunta de Galicia, Luis Bará, comprometeu onte o apoio da consellería de Cultura e Deporte na proxección exterior da cultura galega por medio de "selos de identidade" como o de Berrogüetto. Bará incidiu, ademais, na importancia da música na produción cultural de Galiza.
O voceiro do grupo, Anxo Pintos laiouse onte de que lles sexa máis doado conseguir concertos en Europa que nas cidades españolas, onde "quizais non está moi avanzado o recoñecemento da diversidade cultural". Nesta liña, apuntou que a "falta de normalización" das culturas periféricas "ten que cambiar" por unha "filosofía da convivencia".
Unha xira intensa desde Vigo
A xira de presentación de 10.0 conta co patrocinio de Caixanova e ca colaboración da consellería de Cultura e Deporte e Innovación e Industria, por mediación do Xacobeo. O primeiro concerto terá lugar en Vigo (2 de xuño, Centro Cultural Caixanova) e segue en Lugo (3 de xuño, praza de Santa María), Barcelona (10 de xuño, Sala Bikini), Ourense (12 de xuño, Praza Maior), Santiago (22 de xuño, Auditorio de Galiza) e Pontevedra (30 de xuño, Pazo da Cultura). O concerto de Vigo abrirá unha xira "que se prevé intensa", na que visitarán as prinicpais vilas galegas, ademais de tocar polo resto do Estado e en Europa.
Sete son os integrantes de Berrogüetto: Quico Comesaña (bouzouki, mandolina e harpa céltica); Santiago Cribeiro (acordeón); Quim Farinha (violín); Guillermo Fernández (guitarra acústica e eléctrica); Guadi Galego (voz e gaita); Isaac Palacín (batería e percusións); e Anxo Pintos (zanfona, saxo, frauta, teclado, duduk, gaita e violín). Rodrigo Romaní asina o texto introdutorio deste 10.0 e nel sinala: "Berrogüetto vive nun perpetuum mobile, sempre cuestinonándose a si mesmos, sempre inquedos no seu papel de grupo emblemático da música galega, agasallando os seus seguidores (entre os que me atopo) con xoias musicais tan valiosas como pouco frecuentes".
