A páxina web humorística ‘Aduaneirossemfronteiras.org’ dedicoulle onte a súa portada a Díaz Pardo FOTO: G.H.

"Aínda estou vivo", advertía onte Isaac Díaz Pardo, agradecendo a solidariedade e erguendo o dedo índice, aínda que admitiu certa saturación ante os acontecementos destes días. A controvertida manobra que apartou o intelectual galeguista e os seus fillos do control do Grupo Sargadelos xerou unha cadea de manifestacións de apoio que bole pola rede. Ademais dunha campaña "online" de recollida de firmas contra a "xubilación forzosa" de Díaz Pardo, nos foros sumaba adeptos a proposta de facer boicot aos productos do conglomerado.

Tras publicarse onte que os accionistas de Sargadelos decidiron destituílo da presidencia do Consello de Administración, e en consecuencia arrebatarlle o control do Grupo, unha iniciativa abriu na web FirmasOnline.com, unha campaña de recollida de sinaturas de condena.

Sargadelos celebrou o martes en Cervo unha asemblea de accionistas que acordou a saída de Isaac Díaz Pardo e dos seus fillos Camilo e Xosé Díaz, deica agora administradores do grupo empresarial. O Consello de Administración prevé que a vindeira semana se coñeza o nome do novo presidente do Grupo.

Os accionistas argumentan a necesidade de adaptar a empresa aos novos tempos e denuncian que Díaz Pardo se nega a dialogar ao respecto. Pola súa banda, o intelectual galeguista acúsaos de deslealdade e de querer rachar cos principios fundacionais da empresa. Hai uns anos Díaz Pardo -que na actualidade ten 86 anos- deixou xa de ter o control sobre o proxecto que axudara a fundar, na actualidade constituído por unha ducia de sociedades.

Ante este feito, na web FirmasOnline.com aparece unha campaña dirixida "a todo o Pobo galego" e na que se pode ler: "As Cerámicas do Castro e Sargadelos, un referente fundamental da nosa cultura e identidade do noso pobo atópase, en perigo".

Nun breve texto, alúdese a que "a alma máter, o seu fundador, a súa identidade e o noso intelectual xa non está á fronte deste complexo polo desexo capitalista dalgúns indocumentados". Asemade, apélase a todos os galegos para "impedir esa xubilación" e propoñen a recollida de firmas para esixir a volta de Díaz Pardo á fronte do Grupo Sargadelos.

Ademais, os lectores engadiron numerosos comentarios de apoio ás informacións sobre a destitución de Díaz Pardo publicadas na edición electrónica de EL CORREO GALLEGO. Colectivos como o Centro Galego de Castellón O Aturuxo, ademais de persoas anónimas deixaron na rede mensaxes de indignación ante "a vergoña" da "argallada" perpetrada contra o que se cualifica como "alma mater de Sargadelos". Neste foro, un dos lectores propón, ademais de fomentar homenaxes a Díaz Pardo, unha "campaña activa de boicot comercial para todos os produtos de Sargadelos-Castro: para que se enteren e corrixan".