Moito máis ca tendas

As editoriais escollen con frecuencia as librerías para as presentacións dos libros, como esta realizada na Couceiro, en Compostela FOTO: Fernando Blanco

Unha librería pode ser moito máis ca un centro de venda de libros. Así o entenden moitos libreiros galegos que realizan un salientable labor cultural ó impulsar desde o seu negocio diversas actividades que xiran en torno ó mundo da lectura.

Os actos de presentación e sinatura de libros son os máis comúns entre os organizados por estes libreiros. "É un xeito de apoiar a autores que empezan", explica a copropietaria da librería coruñesa Lume, Lola Porto.

"Antes da democracia tiñamos tamén conferencias que supoñían unha oportunidade para que a xente puidera reunirse e falar", lembra Porto. A librería santiaguesa Follas Novas cumpriu durante a ditadura esa mesma función de pequeno refuxio para o diálogo e o libre pensamento. "Traiamos de Bos Aires libro galego prohibido aquí, coma o Sempre en Galiza de Castelao", sinala o dono de Follas Novas, Rafael Silva.

Esta librería destaca, coma a Sargadelos e a compostelá Couceiro, polo seu especial compromiso co libro galego. "Facemos animación á lectura: dramatización, recitais poéticos, contacontos, obradoiros de ilustración, exposicións...", subliña Begoña López, de Sargadelos Ferrol. "No novo local haberá unha planta disponible para todo tipo de actos, pois tentamos que a nosa librería sexa un punto de reunión para todo o relacionado co libro", apunta pola súa banda Pablo Couceiro.

Como lugar para o encontro e o debate actúan tamén outras librerías, como a propia Sargadelos, que acolle charlas sobre temas de actualidade, e a Nós, na Coruña. "Creamos un club de persoas que se reúnen no noso local para falar de literatura", conta a propietaria deste establecemento, Cecilia Martínez.

O local de Nós está especialmente deseñado, coma o que alberga en Lugo á librería Trama, coma un espazo para o intercambio entre lectores. "Temos un rincón cun sofá, unha lámpara e unhas follas nas que asinaron varios artistas, e que están cheas de recomendacións", afirma Martínez.

"A librería naceu xa con ese espírito, coa idea de converterse nun espazo para o libro. Aquí todos os libros están á vista, e os clientes poden pasar un tempo vendo o que hai e falando sobre literatura", engade o copropietario da libraría Trama, Carlos Coira.