Xoves 29.07.2010
| Actualizado 18.52
Hemeroteca web
|
RSS
RSS
|
 |
| Mural de Marc Taeger realizado con anacos de carbón evocando os efectos dos lumes que afectaron ós montes galegos o pasado verán FOTO: Gabriela Tellez |
O Museo de Arte e Deseño Contemporánea (MADC) de San Xosé de Costa Rica acolle ata o 12 de novembro a mostra Sal á sopa. Pejibaye pal vigorón, no que participan artistas españois e centroamericanos. E entre eles destaca o deseñador Marc Taeger, establecido en Galicia, que intervén na sala 1 do MADC cun gran mural pintado con anacos de carbón, material co que o artista evoca o rastro dos incendios que afectaron a Galicia durante o pasado mes de agosto.
Con este xesto o artista aposta por enfocar a catástrofe ecolóxica dende un punto de vista construtivo, convertendo a destrución en creación artística e logrando así que a madeira queimada "renaza como unha ave fénix".
Taeger, ademais, é ilustrador de libros, entre os que destacan A verdadeira historia de Carapuchiña,co que gañou o Premio daniel Gil de Deseño Editorial 2005, e Aquiles o puntiño, ambos os dous editados por Kalandraka.
A mostra, que se expón no MADC, consiste en dous proxectos que conflúen nunha mesma exposición, para unir o talento de artistas procedentes de ambos os dous lados do Atlántico. Na presente edición, que se desenvolve no MADC, únense 12 artistas de Costa Rica e Nicaragua, entre os que figuran Joaquín Rodríguez del Paso, Lucía Madriz, Rolando Castellón, Roberto Lizano, Alicia Zamora, Óscar Rivas ou Ernesto Salmerón.
Precisamente, no mural elaborado por Marc Taeger tamén interveu o artista costarriqueño Federico Herrero, que engadiu elementos de cor á obra, logrando así un resultado "colectivo", acorde co espírito da exposición.
Xunto con Carles Poy, tamén o director do Museo de Arte e De- seño Contemporáneo de Costa Rica, Ernesto Calvo, contribuíu a dar forma a esta exposición, que se inaugurou o pasado 12 de outubro coincidindo co Día da Hispanidad.
A obra dos 19 artistas participantes destaca pola variedade de estilos, técnicas e propostas estéticas, co obxectivo de xerar un espazo común aberto a novas experiencias creativas.
Unha iniciativa de Carlez Poy
Sal á Sopa é unha iniciativa do catalán Carles Poy, que se levou a cabo entre novembro do pasado 2004 e decembro de 2005 na Capella de l"Antic Hospital da Santa Creu en Barcelona.
Cara á itinerancia da mostra
O obxectivo dos comisarios desta exposición colectiva é dotar de itinerancia a esta mostra e exhibila non só en Costa Rica, senón tamén en Nicaragua, Chile, Perú e España.
