Un traballador permanece en prognóstico reservado tras caer dende unha altura de catro metros en Silleda

Un traballador atópase hospitalizado con prognóstico reservado tras sufrir un accidente laboral na localidade pontevedresa de Silleda, cando o home se precipitou desde unha altura duns catro metros ó caer da estada na cal estaba traballando.

Segundo informou a Central de Urxencias 112-Galicia, o suceso ocorreu ó redor das 09.30 horas desta mañá nunha casa en obras da parroquia de Cira, en Silleda, cando o traballador, identificado coas iniciais M.R.M., duns 50 anos de idade, caeu da estada.

O traballador foi trasladado ó Complexo Hospitalario Universitario de Santiago (CHUS), onde permanece consciente e orientado e o seu prognóstico é reservado, xa que o equipo médico agarda a ver a súa evolución nas próximas horas e os resultados das probas que se lle practicaron, segundo informaron fontes hospitalarias.

Ó lugar do suceso desprazouse unha dotación da Garda Civil e dous efectivos do Grumir de Silleda, así como unha ambulancia do 061, que nunha primeira avaliación médica determinou a gravidade das feridas do operario.